Policia ka gjetur një trup të pajetë në zonën e Niklës. Burimet nga policia bëjnë me dije se trupi i pajetë i përket 34-vjeçarit të zhdukur në Laç që prej datës 9 Korrik, Elion Hysës. Trupi është gjetur i groposur dhe dyshohet se është vrarë. Megjithatë trupi i gjetur do t’i nënshtrohet ekspertizës mjeko-ligjore. Elion Hysa, njihet edhe me emrat Keisi dhe Elvis Hysa. Ai ishte denoncuar i zhdukur nga familjarët e tij.
Denoncimi për zhdukjen e 34 vjecarit
(lajmi i datës 10 korrik)
Një 34-vjeçar nga Laçi, rezulton i zhdukur prej katër ditësh dhe dyshohet se mund të jetë vrarë. Eljon Hysa rezultonte në kërkim nga policia pasi është dënuar në mungesë për një vrasje të ndodhur me 10 Korrik të vitit 2015 në Sarandë.
Xhaxhai i Hysës i tha ABC News se “34-vjeçari doli natën nga shtëpia dhe ka dyshime se mund t’i jetë ngritur një kurth. Familjarët e Hysës denoncuan rastin ditën e hënë, duke kërkuar ndihmën e policisë për gjetjen e djalit të tyre, ndërkohë që prej tre vitesh i fshihej drejtësisë”.
Elion Hysa, rezulton i shpallur në kërkim nga policia si bashkëpunëtor në vrasjen e Edmond Theodhorit në Sarandë. Ndërkohë Drejtoria Vendore e Policisë në Lezhë bën me dije se menjëherë pas referimit të rastit, strukturat e policisë janë vënë në lëvizje për gjetjen e 34-vjeçarit i cili është zhdukur pa lënë gjurmë.
Kjo ngjarje u denoncua fillimisht në faqen zyrtare në facebook të ish-kryeministrit Berisha. Denoncuesi akuzonte policinë se nuk ka bërë asgjë për të gjetur 34-vjeçarin e zhdukur prej disa ditësh.
“Zoti Berisha, jam një qytetar nga Laçi me emrin Asllan Hysa. kam një problem të jashtëzakonshëm. Më datë 5 korrik, ora 09:30 ka humbur kontaktet djali i vëllait Keisi Eljon Hysa në zonën e Niklës në Fushë Krujë. Dyshoj se edhe mund të jetë vrarë dhe policia nuk po reagon fare që nga data 6 Korrik që është bërë denoncimi në komisariatin e Laçit”, shkruante xhaxhai i të riut.
