Kronikë

3 fëmijë panë autorët, detaje nga dosja e atentatit të prokurorit Ndoj


Bëhu pjesë e Grupit Zyrtar të Opinion.al
>> KËTU <<
               Publikuar në : 14:26 - 13/01/21 |
Opi Nion

Detaje të reja janë zbardhur nga dosja hetimore e atentatit të prokurorit Arjan Ndoj. Në dosjen hetimore të SPAK të cilën e disponon News24 thuhet se “nga hetimet del e qartë se “autorët kanë patur në shënjestër të tre personat që udhëtonin në automjet, për faktin se cilësitë e Arjan Ndoj si prokuror ishin të njohura”. Ky argument provohet nga shkalla e lartë e organizimit, si dhe nga përgatitja e autorëve për ngjarjen. Ata studiuan lëvizjet e të dëmtuarve, qëlluan në drejtim të automjetit të prokurorit me armë zjarri shumë të fuqishme, si automatik model 56.

“Intensiteti i sulmit tregon qartë se autorët nuk kanë qenë përzgjedhës në shënjestrën e tyre, por kanë patur objekt automjetin, ku ndodhej prokurori dhe dy personat e tjerë”, thuhet ne dosje. Megjithatë prokuroria nuk ka mundur të zbardhë motivin e krimit.

Sipas SPAK, ish-dentist i burgut Rraja ishte në rolin e ekzekutorit, ndërsa Arjol Halilaj ndihmës, për faktin se siguroi automjetin që u përdor dhe i largoi atentatorët nga vendi i krimit.

Redjan Rraja mohon të ketë lidhje me krimin, por një palë syze të gjetura në makinën e braktisur në Shkafanë, ku u zbuluan gjurmët e tij të gishtërinjve, si dhe një kampion ADN që u përftua në një kapuç, janë dy nga provat kryesore që e implikojnë në ngjarje.

Prokuroria thotë gjithashtu se Rraja gënjen edhe lidhur me lëvizjet që ka bërë ditën e ngjarjes. Ai thotë se shkoi në Durrës të kolaudonte makinën, ndërkohë që veprimet i kreu Arjol Hailaj. Ky i fundit deklaron se drejt Tiranës u rikthye rreth orës 17.00 të datës 1 nëntor, por në fakt nga pamjet filmike rezulton se automjetin e tij e drejtonte një person tjetër.

Alibia e Rrajës rrëzohet edhe nga familjarët e tij. Bashkëshortja ka dëshmuar se për rreth një muaj nuk ishte takuar me të, pasi Redjani i kishte thënë që ndodhej jashtë vendit, ndërsa e merrte në telefon dhe pyeste vazhdimisht për fëmijët. “Nga kjo del qartë se Redjan Rraja në përpjekje për ndërtimin  e një alibie ka përgatitur familjarët e tij se do të ikte jashtë shteti”, thekson prokuroria.

Një tjetër provë e fortë ndaj tij janë dëshmitë e tre vëllezërve të mitur, të cilët kanë parë atentatorët, kur braktisën makinën në pronën e familjes së tyre. Njëri prej të miturve thote se personat ishin të maskuar dhe mbanin armë. Ndërsa në sediljen e pasme kishin lënë automatikët. Djali tregon se teksa largoheshin, pranë tyre u afrua një automjet tjetër dhe njëri nga personat që ndodhej në të, i kërcënoi duke iu thënë “pse se përfunduat punën, do t’ju pres fytin”. SPAK është duke zhvilluar hetime për të identifikuar jo vetëm atentatorin e dytë, por edhe urdhëruesit e krimit.

Kujtojmë se atentati ndaj prokurorit Arjan Ndoj ndodhi më datë 1 nëntor të vitit 2019 në mbikalimin e Shkozetit në Durrës. Ndaj makinës së prokurorit u derdhën breshëri plumbash. Nga të shtënat mbeti i vdekur Andi Maloku, i cili shërbente si shofer i prokurorit Arjan Ndoj./Opinion.al

Pas