Kreu i Partisë Demokratike, Lulzim Basha pak minuta më parë doli në një konferencë për mediat duke folur për zgjedhjet në Dibër.
Basha e cilësoi fitoren e Muharrem Ramës si fitore të kartelit të drogës dhe të krimit.
Ai tha se nga kjo zgjedhje qytetarët dibranë kanë humbur, ka humbur Shqipëria dhe politika.
“Karteli drogës e fitoi këtë betejë. Ne e humbëm këtë betejë, unë dua të falënderoj 14 mijë qytetarë që nuk u joshën, nuk u bletë nuk u trembët nuk u mposhtët, por votuat për votën e lirë”, tha Basha.
“Dibranët u përballën me kartelin e drogës, dhe korrupsionit. Fatkeqësisht në këtë përplasje fitoi karteli krimit dhe humbi politika.
Sot në Dibër humbi politika e ndershme, humbi Shqipëria. Humbën vlerat europiane, humbën dhe të varfrit, që u joshën nga paratë e krimit dhe nga paratë e korrupsionit. Humbën edhe ata që nuk menduan për të nesërmen dhe panë përfitimin e momentit. Humbën edhe ata që votuan për Muhamet Ramën”, vijoi ai.
“Ne nuk i humbëm zgjedhjet në Dibër para qytetarëve të ndershëm dibranë, por sot humbëm para kartelit të drogës. Ky kartel shfrytëzoi mjerimin varfërinë humbjen e shpresës. Ata kanë humbur shpresën te politika.
Humbja e shpresës është përdorur në mënyrë mjeshtërore nga pushtetit. E kuptoj zgjedhjen e tyre. Unë do të luftoj edhe për lirinë e tyre. Do të luftoj që jeta e tyre të mos varet nga politika. Ne bëmë më të mirën që mundëm. Donim sinqerisht të bënim një ndryshim që niste nga Dibra”, tha Basha.
Ai më pas shtoi se që nga sot, PD i shpall luftë kartelit të drogës.
