Aktualitet

13 vende të BE pro negociatave, kërkesë në Bruksel të mërkurën


               Publikuar në : 13:56 - 11/06/19 |
Al Do

Trembëdhjetë vende të BE-së, shumica anëtarë të rinj nga Evropa Qendrore dhe Lindore, plus Italia dhe Austria, do t’i kërkojnë 28 vendeve të BE-së  të rrisin besueshmërinë për projektin e zgjerimi të BE duke nisur nga vendet e Ballkanit Perëndimor.

Sipas EUROACTIV, Estonia, Lituania, Letonia, Republika Çeke, Polonia, Sllovakia, Hungaria, Bullgaria, Italia, Austria, Kroacia, Sllovenia dhe Malta do ta bëjnë këtë kërkesë në një takim ambasadorësh në Bruksel ditën e mërkurë.

“Ideja është të nisë një thirrje për hapjen e negociatave të pranimit me Shqipërinë dhe Maqedoninë e Veriut”, tha për EURACTIV një diplomat i njërit prej 13 vendeve, emri i të cilit nuk është bërë publik.

“Kjo është gjithashtu një formë presioni, që do të thotë të themi se dilema e parë nëse kemi nevojë për thellimin e BE dhe zgjerimin më vonë është artificiale dhe e gabuar. Nëse të dyja proceset nuk shkojnë së bashku, BE së shpejti do të përballet me Ballkanin Perëndimor përsëri, por fatkeqësisht në një mënyrë më kërkuese dhe të dhimbshme për të dyja palët”-tha diplomati.

Komisioni Evropian ka rekomanduar zyrtarisht hapjen e bisedimeve me Shkupin dhe Tiranën, por vendimi duhet të merret unanimisht nga të gjitha vendet anëtare në Këshill, ku Franca dhe Holanda udhëheqin votën kundër.

“Është duke u bërë gjithnjë e më e vështirë për të kuptuar këtë dilemë artificiale, sepse ne po flasim për hapjen e negociatave dhe jo për zgjerimin aktual. Natyrisht, Perëndimi nuk mund ta kuptojë këtë”, ka thënë ai.

Në Gjermani, zgjerimi ka ndarë koalicionin qeverisës të madh. CDU / CSU kundërshton një fillim të shpejtë të bisedimeve me Tiranën dhe Shkupin. Gunther Krichbaum, kryetar i Komitetit të Europës të Bundestagut, tha se një vendim nuk do të arrihet përpara tetorit.

Por Ministri i Shtetit në Ministrinë e Jashtme, Michael Roth (SPD), dëshiron që negociatat të fillojnë menjëherë. “Tani e ka rradhën BE. Ne dhamë fjalën tonë dhe duhet të mbajmë premtimet tona, “shkroi Roth në një artikull për të përditshmen gjermane Frankfurter Allgemeine Zeitung. /Opinion.al

Pas