Zyrtarët palestinezë në Gaza thonë se e diela ishte dita më vdekjeprurëse që nga fillimi i luftimeve me Izraelin. 42 njerëz u vranë nga sulmet ajrore izraelite të dielën.
Ndërsa Ushtria e Izraelit thotë se militantët palestinezë kanë qëlluar më shumë se 3,000 raketa në drejtim të Izraelit gjatë javës së kaluar.
Sekretari i Përgjithshëm i Kombeve të Bashkuara António Guterres ka paralajmëruar se luftimet e mëtejshme mund ta fusin rajonin në një “krizë të pakontrollueshme”.
Ai bëri thrrje për t’i dhënë fund menjëherë dhunës të cilën e cilësoi si “krejtësisht të tmerrshme”.
Mëngjesin e të hënës, aeroplanët luftarakë izraelitë filluan 80 sulme ajrore në disa zona të qytetit të Gazës, menjëherë pasi militantët e Hamasit hodhën një breshëri raketash në Izraelin jugor.
Kombet e Bashkuara paralajmëruan gjithashtu se mungesa e karburantit në Gaza mund të lërë pa energji elektrike spitalet dhe objektet e tjera. LynnHastings, zëvendëskoordinatore posaçme e OKB për procesin e paqes në Lindjen e Mesme, i tha BBC se u kishte bërë thirrje autoriteteve izraelite që të lejonin furnizimin me karburant të Gazës, por diçka e tillë nuk është e sigurt.
Në sulmet ajrore të së dielës zyrtarët e Gazës thanë se 42 persona, përfshirë 16 gra dhe 10 fëmijë, humbën jetën. Në Izrael dhjetë persona, përfshirë dy fëmijë, janë vrarë në sulmet me raketa.
Numri i përgjithshëm i të vdekurve në Gaza arriti në 188 vetë, përfshirë 55 fëmijë dhe 33 gra dhe 1,230 vetë janë plagosur, sipas ministrisë së Shëndetësisë së Gazas që kontrollohet nga Hamasi. Izraeli thotë se mes viktimave ka me dhjetëra militantë./Opinion.al
