Zv. ministrja e Shëndetësisë dhe Mbrojtjes Sociale, Mira Rakacolli ka folur për situatën e fruthit në vend, duke pranuar se kemi të bëjmë me një epidemi. “Janë 132 raste me fruth në total që nga janari i këtij viti dhe 94 raste janë vetëm në Tiranë”, tha ajo duke specifikuar se më të prekur dhe më të rrezikuar janë fëmijë nga 0-1 vjeç që janë të pavaksinuar.
Duke folur në News 24, doktoresha dhe njëherazi zyrtare, Mira Rakacolli u shpreh:
“Ne publikojmë shifrat çdo javë në buletinin e përjavshme dhe dje ka qenë shifra që unë publikova. Pra janë 132 raste në total që nga janari dhe 94 janë në Tiranë. Moshat më të prekura janë fëmijë nga 0-1 vjeç dhe të pavaksinuar që përbejnë rreth 74% të të prekurve. Fruthi përhapet përmes ajrit dhe e vetmja mbrojtje është vaksina, pasi pa atë fruthi do ishte si gripi. Bëhen dy vaksina, një në 1 vjeç dhe doza tjetër bëhet në moshën 5-vjeçare”- thotë zv.Ministrja e Shëndetësisë.
Ndërkohë e pyetur nëse kemi të bëjmë me epidemi, Mira Rakacolli e pohoi, ndërsa u shpreh se shenjat e fruthit janë të njëjta me ato të gripit në fillim. Ajo ka një apel për qytetarët që dyshojnë tek fëmijët e tyre që t’i çojnë në 4 qendra që rrinë 24 orë hapur.
“E thënë në mënyrë shkencore mund të them se kemi të bëjmë me një epidemi pasi shifrat kanë qenë 0 dhe janë rritur. Në ajër është e pamundur që Shqipëria t’i shpëtojë kësaj epidemie, pasi rastet janë shtuar në rajon dhe Evropë. Shenjat e para të fruthit kanë shenjat e gripit, sidomos 4 ditët e para. I apeloj qytetarët që t’i çojnë fëmijët e tyre nëse kanë dyshime në një nga 4 qendrat në Tiranë që qëndrojnë 24 orë hapur”- tha Mira Rakacolli. Nëse keni kontakt me të sëmurin duhet të vaksinoheni 72 orë pas kontaktit”, theksoi zv.Ministrja e Shëndetësisë.
