Zoran Zaev ka vendosur që të anulojë dorëheqjen e tij si kryeministër i Maqedonisë së Veriut.
Lajmi është bërë i ditur nga partia e tij mbrëmjen e djeshme. Organet më të larta partiake të LSDM-së, Këshilli Ekzekutiv dhe Qendror kanë vendosur që Kryeministri dhe lideri i LSDM-së, Zoran Zaev, të anulojë dorëheqjen deri në stabilizimin e situatës në vend.
“Kishte diskutim të frytshëm mes anëtarëve të Këshillit Ekzkutiv dhe Qendror dhe duke marrë parasysh momentin në të cilin gjendet vendi, u rekomandua dhe njëzëri u miratua vendimi që Kryetari dhe Kryeministri Zaev ta anulojë dorëheqjen e tij në kohë të pacaktuar”, tha Pero Kostadinov nga LSDM-ja.
Një nga argumentet për shtyrjen e dorëheqjes është mundësia që Maqedonia e Veriut të fillojë negociatat me BE-në në dhjetor. LSDM theksoi se Zaev e ka dorëzuar dorëheqjen, por organet e partisë nuk e kanë pranuar.
LSDM humbi në zgjedhjet lokale në Maqedoninë e Veriut, ç’ka bëri që Zoran Zaev të paralajmëronte dorëheqjen nga posti i kryeministrit, si edhe nga drejtimi i LSDM-së.
Sakaq, opozita ka dorëzuar një mocion mosbesimi në Kuvend duke pretenduar se ka mbledhur 61 firmat e nevojshme për rrëzimin e qeverisë./Opinion.al
