Zhaklina Peto ka ngritur padi kundër Këshillit të Emërimeve në Drejtësi lidhur me ndërprerjen e garës për në Gjykatën Kushtetuese.
Peto shprehet se vendimi i KED është i paprecedentë, i zhytur në paligjshmëri dhe në kundërshtim të hapur dhe në manipulim të vullnetit të saj të lirë.
“Unë kërkuesja Zhaklina Peto, kam aplikuar pranë Këshillit të Emërimeve në Drejtësi për vendin vakant për gjyqtare në Gjykatën Kushtetuese, vakancë e shpallur nga presidenti i Republikës me datën 22 Nëntor 2019. Pasi u njoha me arsyetimin e vendimit nr. 61 datë 23 Dhjetor 2020 të Këshillit të Emërimeve në Drejtësi për përfundimin e procedurës së verifikimit, vlerësimit, pikëzimit dhe renditjes së kandidaturës së Zhaklina Petos për shkak të dorëheqjes nga kandidimi për vendin vakant për gjyqtar në Gjykatën Kushtetuese të shpallur nga presidenti, bazuar në parashikimet e nenit 238, pika 1 të Ligjit nr. 115/2016 “Për organet e qeverisjes së sistemit të drejtësisë”, kundërshtoj këtë vendim si një akt i marrë në shkelje të rënda të procedurës së gjykimit”,- thuhet në padinë e Petos.
Këshilli i Emërimeve në Drejtësi më 23 dhjetor përmes një njoftimi për mediat, bëri me dije përfundimin e procedurave për verifikimin e kandidimit të Zhaklina Petos për Gjykatën Kushtetuese, duke raportuar se ajo ishte tërhequr nga gara.
Para këtij vendimi, Peto është skualifikuar 2 herë nga KED për garën në Gjykatën Kushtetuese, por u rikthye sërish nga Gjykata Administrative e Apelit./Opinion.al
