Pas disfatës në zgjedhjet e pjesshme vendore të 6 Marsit, Partia Demokratike do të mbledhë grupin parlamentar pasditen e sotme.
Mësohet se mbledhja pritet që të zhvillohet në orën 16:30 në ambientet e selisë së PD.
PD nuk ka fituar asnjë prej bashkive, ku të dielën u zhvilluan zgjedhjet për kryebashkiak.
Lulzim Basha në një prononcim më herët për mediat i cilësoi zgjedhjet e 6 Marsit si“një anomali e një anomalie”.
Po ashtu ai foli për reflektim dhe reformim të thellë brenda PD-së: “Nuk ka shqiptar që nuk e kupton se 6 marsi është një anormalitet. Asgjë nuk ka ndryshuar me krimin zgjedhor të 25 prillit. Me një mospjesëmarrje tregon se qytetarët e braktisën procesin sepse nuk kishte asnjë garanci. PD-së iu mohuan komisionerët. Aleanca e non gratave kërcënoi komisionerët në Vorë. Ne kemi bërë 3 denoncime në SPAK për mospërmbushje të detyrave. Shqipëria ka arritur në një pikë të papranueshme sa i përket zgjedhjeve, këtë e tregoi dhe elektorati me mospjesëmarrje. Na takon ne të bëjmë një reflektim për reformim të brendshëm që ka nisur, nevojës për t’u ndarë nga e shkuara. Nuk është koha për t’i ikur përgjegjësive, por janë asgjësuar zgjedhjet. PD është në një sulm të shumëfishtë për nevoja personale. Përgjigjja jonë është një reformë më e thellë”.
