Sekretari britanik i Shëndetësisë, Steve Barclay, në një intervistë tha se azilkërkuesit duhet të kthehen sërish në anijen ‘Bibby Stockholm’, pavarësisht zbulimit të një bakteri të rrezikshëm të quajtur Legionella.
Bakteret Legionella mund të shkaktojnë një infeksion potencialisht vdekjeprurës të mushkërive të njohur si sëmundja e Legjionarëve. Asnjë nga azilkërkuesit nuk ka shfaqur simptoma të sëmundjes, sipas Zyrës së Brendshme.
Azilkërkuesit u hoqën nga anija të premten pasi bakteri Legionella u gjet në sistemin e ujit të anijes.
Ky bakter u gjet në sistemin e ujit të anijes, e cila bëri që 39 azilkërkues të zhvendoseshin prej “burgut lundrues” pak ditë pasi u vendosën aty, por Barclay mendon se emigrantët duhen rikthyer në vendet e tyre, raporton Sky News.
I pyetur në lidhje me pretendimet se Ministria e Brendshme ishte informuar për rezultatet e testit që zbuloi bakterin të martën, ai tha:
“Kjo është një gjë standarde që kishte bërë këshilli. Nuk ka asnjë arsye për të sugjeruar se kishte shqetësime. Si masë paraprake u bënë testet. Sapo u njoftuan ministrat të enjten mbrëma, ata morën masa të menjëhershme”.
Ai gjithashtu tha se azilkërkuesit duhet të ktheheshin për arsye edhe të ekonomisë së vendit, ku strehimi i tyre nëpër hotele kushtonte 6 milionë paund në ditë, duke përmendur edhe ruajtjen e sigurisë.
“Po, po, sepse kushton rreth 6 milionë paund në ditë kostoja e hoteleve për mbajtjen e tyre në hotele. Është e rëndësishme që ne të ruajmë standardet e sigurisë, por gjithashtu të reflektojmë presionin mbi pozicionin e tatimpaguesve britanikë për sa i përket atyre 6 milionë paundëve”, ishte përgjigja e Barclay, kur u pyet për rikthimin e mundshëm të azilkërkuesve në anijen Bibby Stockholm.
Vitet e fundit ka pasur shpërthime të sëmundjeve të ndryshme infektive të rralla në disa objekte për azilkërkuesit.
Mbipopullimi dhe higjiena e dobët janë shpesh fajtorë së bashku me shkallën e ulët të vaksinimit në pjesë të botës nga vijnë emigrantët.
Sipas Agjencisë së Sigurisë Shëndetësore në Mbretërinë e Bashkuar (UKHSA) ka pasur raste të difterisë, streptokokut të grupit A, MRSA, zgjebe, tuberkuloz dhe shigella gjatë dy viteve të fundit.
Mijëra emigrantë duhej të vaksinoheshin kundër difterisë, kundër së cilës fëmijët imunizohen në mënyrë rutinore në MB, pasi rastet u identifikuan në qendrën e përpunimit Manston në Ramsgate, Kent në fund të vitit 2022.
Ato ishin më të zakonshme te meshkujt e moshës 14 deri në 25 vjeç, të cilët kryesisht paraqiteshin me lezione të lëkurës. Zgjebja ishte gjithashtu një problem atje dhe në objektin e Kazermës Napier pranë Folkestone./Opinion.al
