Forcat speciale të RENEA-s kanë zhvilluar një aksion policor në qytetin e Laçit ditën e sotme në lidhje me vrasjen e Shkëlzen Kastratit në qytetin e Fierit më datë 1 Shkurt 2021.
Klan news raporton se forcat speciale kanë ushtruar kontrolle në disa vende me qëllim arrestimin e personave të përfshirë në atentat. Policia ka dyshime se në zonë mund të fshihen disa prej autorëve të ngjarjes.
Lidhur me këtë ngjarje, Policia e Shtetit njoftoi disa ditë më parë se ka identifikuar 4 autorët që morën pjesë në ekzekutimin e Kastratit. Ata janë Albert Zaja, Elmir Tufa, Elson Xheçuka dhe Roland Cara.
Por, sipas të dhënave nga sistemi TIMS, ata janë larguar nga Shqipëria të ndarë nga njëri-tjetri pas ngjarjes. Duke iu referuar të dhënave të sistemit TIMS rezulton se 2 nga 4 të kërkuarit janë larguar drejt Kosovës dhe më pas drejt një shteti të BE-së. Në orare të ndryshme, ata janë kujdesur që të mos qëndrojnë së bashku teksa largoheshin nga Shqipëria.
Sipas policisë Albert Zaja, Elmir Tufa, Elson Xheçuka dhe Roland Cara po hetohen si vrasës me pagesë dhe porosia është bërë nga persona të tjerë, të cilët janë ende mister.
Shkëlzen Kastrati u ekzekutua me dy plumba, njërin prej tyre në kokë, paraditen e së hënës së 1 shkurtit, në fshatin Sheq në Fier brenda teksa ka qenë në lëvizje me makinë. Pasi qëlluan drejt Kastratit autorët u larguan nga vendi i ngjarjes me një makinë tip ‘Range Rover’. Kastrati ka ecur disa metra duke u përplasur me një makinë tjetër që po kalonte aty. Hetimet janë përqendruar tek hakmarrja, për shkak të së kaluarës së vëllati të Shkëlzen Kastratit./Opinion.al
