Politikë

Vokshi: Nuk ka gazetarë kriminelë, Rama bën propagandë me fatkeqësinë


               Publikuar në : 19:58 - 02/12/19 |
Al Do

Ish-deputetja e Partisë Demokratike Albana Vokshi ka reaguar pas sulmeve që kryeministri Rama ka bërë sot ndaj mediave.

Sipas saj kryeministri po bën propagandë me fatkeqësinë që i ka ndodhur vendit. Në një status në Facebook, Vokshi shkruan se gazetarët nuk janë kriminelë.

Në lidhje me rastin që u bë sot publik të një qytetari në Durrës që kishte humbur babain, për të cilin Rama bëri përgjegjës mediat, Vokshi shkruan se gazetarët raportuan “njoftimin e Ministrisë së Shëndetësisë se Spitali i Durrësit po evakuohej.”

Statusi i Albana Vokshit

Nuk ka gazetarë kriminelë! Ka Kryeministër që bën propagandë kriminale me fatkeqësinë

Për të mbuluar përgjegjësinë direkte për keqmenaxhimin e emergjencës pas tërmetit, Edi Rama ka nisur të sulmojë gazetarët, të cilët përcjellin shqetësimet e vërteta të qytetarëve në zonat e prekura.

Nuk janë kriminelë gazetarët që raportuan njoftimin e Ministrisë së Shëndetësisë se Spitali i Durrësit po evakuohej.

Nuk janë kriminelë gazetarët pse një qytetar u lejua të zhvendoset nga spitali i Durrësit pas dhe, fatkeqësisht, humbi jetën rrugës për në Spitalin e Beratit.

Kriminale në këtë histori është përdorimi politik nga Edi Rama i tragjedisë, i tronditjes, i skamjes, i humbjes së besimit dhe sigurisë për jetën dhe banesën.

Kriminale është që të përpiqesh të shtysh edhe një ditë duke gënjyer, duke mashtruar qytetarët për të fshehur gjurmët e mëdha të krimit.

Në emër të Partisë Demokratike, inkurajoj gazetarët të mos intimidohen nga gjuha e dhunshme, e turpshme, e papranueshme e Edi Ramës.

Ngritja e zërit nga gazetarët, pro interesit publik, është arma e vetme për të zhbërë presionin kriminal të Edi Ramës. /Opinion.al

Pas