Aktualitet

Sulmi ndaj mediave/ Basha: Dhunim i fjalës së lirë, prokuroria të hetojë


               Publikuar në : 21:03 - 02/12/19 |
Al Do

Kryetari i Partisë Demokratike, Lulzim Basha i ka cilësuar kriminale sulmet e kryeministrit Rama ndaj mediave.

Në një reagim në Twitter, Basha shkruan se kjo fatkeqësi po shfrytëzohet për të mbyllur portalet kritike me qeverinë.

“Të shfrytëzosh këtë fatkeqësi për të mbyllur portale, faqe fb e rrjete të tjera sociale dhe të kërcënosh gazetarët nga mëngjesi në darkë vetëm pse janë kritikë me qeverinë dhe sjellin zërin e qytetarëve të lënë në harresë dhe pa asnjë ndihmë, është kriminale.”, shkruan Basha.

Ai shton më tej se këto veprime duhen hetuar nga Prokuroria pasi përbëjnë vepër penale.

“Kjo është mënyra për të mbytur zërin e qytetarëve dhe të vërtetës që vjen përmes medias dhe portaleve të ndryshme. Prokuroria duhet të nisë menjëherë hetimet për dhunimin e fjalës së lirë nga qeveria. Me Kushtetutë dhe ligj kjo përbën një krim të rëndë që duhet ndëshkuar.”

Prej disa ditësh, kryeministri Rama ka ftuar kreun e opozitës që të ulen në një tryezë ku të diskutohet mbi idetë e përballimit të situatës pas tërmetit të 26 nëntorit.

Ditën e sotme Basha doli me një plan me 3 pika të cilin Rama në një prononcim për mediat tha se duhet të shpaloset në një tryezë pavarësisht se refuzoi dy nga këto pika.

Rama tha se këto propozime nuk duhet të bëhen si propozimet e reformës zgjedhore dhe asaj në drejtësi “zbato pikat ose hap krahun”, por sipas tij ato duhet të bëhen në një tryezë “pa parti”.

Megjithatë ai e ftoi sërish kreun e PD në tryezën e dialogut për këtë çështje duke nënvizuar se ai ishte ulur sot me Presidentin megjithëse kanë një konflikt të thellë mes tyre.

Basha nuk i është përgjigjur drejtpërdrejtë ftesave të Ramës por ka thënë në prononcimet e tij se është koha për punë dhe se shfaqet para kamerave janë propagandë.

“I bëj thirrje atyre që po e përdorin këtë kohë dhimbjesh dhe vuajtjesh për axhendën e tyre politike, ta fokusojnë energjinë dhe vëmendjen tek ata që kanë më shumë nevojë se kurrë për ndihmë!” shkroi Basha në reagimin e tij të fundit të Facebook përpara se të kërkonte hetim nga prokuroria në lidhje me mbylljen e mediave online. /Opinion.al

Pas