Dasma e Meghan Markle me princin Harry më 19 maj, ishte një nga eventet më të komentuara të vitit që lamë pas.
Një vit më vonë, çifti tashmë prindër të një djali, Archiet, publikuan një fotomontazh me momente të papublikuara më herët nga prapaskenat, përfshirë një moment mes mamasë së nuses, Doria dhe Meghan Markle, të lumtura si asnjëherë më parë në ditën më të rëndësishme të jetës.
Videoja u publikua edhe në Instagram-in zyrtar të Dukës dhe Dukeshës së Sussex-it, bashkë me një shpjegim për këngën e zgjedhur nga vetë çifti për ceremoninë.
“Gëzuar 1-vjetorin e martesës Lartmadhërive të Tyre, Duka dhe Dukesha e Sussex-it! Kënga e përzgjedhur, “This Little Light of Mine”, u përzgjodh nga vetë çifti për ceremoninë e betimeve. Urojmë që ta shijoni rijetimin e këtij momenti, duke parë disa foto nga prapaskenat e kësaj dite të veçantë,” shkruhej në Instagramin e tyre.
Kujtojmë se më 19 maj të vitit të kaluar, Meghan Markle dhe Princi Harry u shpallën burrë e grua në Kishën e Shën George-it. Ceremonia u ndoq nga rreth 36 milion njerëz në 15 televizione të vendeve të ndryshme të botës./Opinion.al
