Pas disa kronikave televizive dhe shkrimeve në media për qumështin me aflatoksinë që tregtohet në vendin tonë, ka reaguar ministri i Bujqësisë Niko Peleshi.
Ai qetësoi qytetarët duke thënë se produktet shqiptare të qumështit janë të sigurta. Pra nuk kanë aflatoksinë. Po kështu ai evidentoi si problem produktet e bulmetit që mund të kenë vaj palme për të cilat ka nisur kontrolli.
Gjatë fjalës së tij ministri Peleshi ka kërkuar dhe njëherë të bëjë të qartë para opionit publik çështjen e përfolur gjatë ditëve të fundit në lidhje me alfatoksinën.
“Pra në përgjigje dhe të shumë lajmeve që në një lloj mënyre kanë tentuar ose kanë ngritur një pikëpyetje për prodhimet shqiptare, kryesisht të qumështit dhe nënprodukteve të tij, siç është aflatoksina, situata është krejt ndryshe. Të dhënat e fundit dhe të analizave të kompanive, të cilat kanë qenë në fokus të diskutimit kanë dalë shumë të mira. Ne jemi në standard shume të mirë, në nivele shumë të kënaqshme të aflatoksinës, që duhet thënë, që nuk është një gjë që ndodh njëherë dhe njëherë e mirë. Varet shumë nga ushqimi që konsumon kafsha. Në qoftë se sot ushqimi i kafsheve ka qënë i mykur, të nesërmen qumështi del me një përqindje më të lartë aflatoksine. Për këtë arsye mbahet në kontroll të vazhdueshëm nga Autoriteti Kombëtar i Ushqimit. Do t’ju lutesha të gjithë konsumatorëve shqiptarë që të mos i largohen prodhimit shqiptar sepse realisht jemi në nivele shumë të kënaqshme. Të gjitha analizat e vazhdueshme tregojnë që prodhuesit tanë kryesorë që tregtojnë prodhimet e tyre nëpër supermarkete dhe markete të liçensuara, janë brenda normave. ka thene ai.
Në mbyllje ministri Peleshi, paralajmëroi nisjen e kontrollit dhe analizave për të gjithe produktet që janë në treg për garantimin e normave të sigurisë dhe cilësisë, duke vendosur theksin tek përdorimi në mënyrë abuzive i vajit të palmës.
Ndërkaq, gjatë fjalës së tij, ministri nuk dha asnjë informacion në lidhje me bllokimin e një sasie mishi prej 53 tonësh në Portin e Durrësit me salmonelë vetëm 6 ditë më parë të ardhur nga Brazili, e cila konsiderohet si një nga sasitë më të mëdha hyrë në vendin tonë duke rrezikuar seriozisht popullatën.
Sasia e mishit transportohej në 4 konteinerë të mbërritur nga Brazili dhe kishte destinacion tregun e brendshëm shqiptar. Autoriteti Kombëtar i Ushqimit njoftoi se mishi brazilian i bllokuar në portin e Durrësit, ishte mostra e 178 e analizuar nga ky institucion që nga muaji Janar.
Pas mbërritjes në port, e gjithë ngarkesa është analizuar dhe një kampion i është dërguar ISUV ku janë bërë veprimet përkatëse. Rezultati i analizave ka nxjerrë se mishi i importuar nga Brazili ka qenë i infektuar me salmonelë, shumë i rrezikshëm për shëndetin e konsumatorit. Pas këtyre veprimeve, e gjithë ngarkesa do të kthehet në vendin e origjinës.
Mësohet se ngarkesa e mishit me salmonelë nga Brazili i përket një kompanie që kryen aktivitetin e saj me qendër në Tiranë, ndërsa Ministria e Bujqësisë nuk i konfirmon emrin.
Arsyet se pse Ministria e Bujqësisë e mban të fshehtë emrin e kompanisë që importoi mishin me salmonelë nga Brazili ende nuk dihen?
Megjithatë, pyetja që shtruan mediat është se kush fshihet pas kësaj ngarkese?
Hashtag.al shkruan se një nga lobuesit më të fuqishëm të importimit të mishit nga Brazili është Alban Zusi. Ai është kreu i Qendrës së Eksporteve Shqiptare dhe bizneset e tij janë pjesë e AFI (Albanian Food Industri).
Zusi njihet si nga njerëzit kyç që merret me tregtimin e mishit në vendin tonë. Gjithashtu njihet si një person shumë i afërt me ministrin e Bujqësisë, Niko Peleshin.
Ai ka kërkuar nëpërmjet shoqatës së tij që siguria ushqimore në vend jepej me koncesion. Zoti Alban Zusi u investua në një studim që parashikonte dhënien me koncension të sigurisë ushqimore, studimi u realizua në bashkëpunim me Fondacionin Soros.
/Opinion.al
