Policia e Shtetit njofton se vijojnë kontrollet për respektimin e rregullave të qarkullimit rrugor dhe sigurinë ndaj aksidenteve.
Duke publikuar një video të realizuar në aksin aksin Sauk – Teg, prej orës 20:30 deri në 00:30, policia vëren një sërë shkeljesh, kryesisht të lidhura me shpejtësië.
“Drejtuesi i motomjetit dhe pasagjeri pa kaska mbrojtëse dhe me shpejtësi 161 km/h, shpejtësi e frikshme dhe vrastare për një motomjet. Gjithashtu drejtuesi i mjetit me 158 km/h si dhe duke kryer manovra të rrezikshme në rrugë, parakalim në krahë të djathtë duke u bërë rrezik potencial për sigurinë e të tjerëve në rrugë”, njofton policia.
Më tej, bëhet me dije se nga kontrollet janë gjobitur disa drejtues mjetesh dhe janë hequr lejet e drejtimit.
“Nga verifikimet dhe monitorimet me matësin e shpejtësisë , në 4 orë, në aksin Sauk -Teg, si dhe nga verifikimet gjatë gjithë ditës në rrugën Interurbane Tiranë-Kërrabë-Tiranë dhe Tiranë-Durrës-Tiranë janë konstatuar dhe pezulluar 24 leje drejtimi për shpejtësi mbi normat e lejuara, të cilat varionin nga 141 km/h – 161km/h , rrezik potencial për të shkaktuar ngjarje rrugore dhe pasoja fatale për jetën e drejtuesit, pasagjerëve, por edhe përdoruesve të tjerë të rrugës.
Janë ndëshkuar 133 drejtues mjetesh për parakalime të gabuara dhe manovra të rrezikshme në rrugë. Janë evidentuar nga rrugorët e kryeqytetit me punonjës civilë dhe janë ndëshkuar me masë administrative 88 drejtues mjetesh pa rrip sigurimi, 241 për përdorim të celularit, 45 drejtues mjetesh me dy rrota, pa vendosur kaskën mbrojtëse si dhe 267 për parkime të gabuara”, thuhet në njoftim.
Gjithashtu mësohet se janë arrestuar 3 drejtues mjetesh për drejtim mjeti në gjendje të dehur si dhe janë pezulluar 12 Leje Drejtimi për drejtim mjeti nën efektin e alkoolit./Opinion.al
