Një deklaratë e deputetit Kostaq Papa, po bën xhiron e rrjetit.
Në përpjekje për të dhënë një mesazh për gratë para 8 marsit, deputeti ka rrëfyer dhe raportin e tij me to. Ndër të tjera, ai shprehet se kur kishte para e kaçurrela iu jepte femrave që kishte afër më shumë pije të shtrenjta sesa ujë.
“Të gjithë duhet të jemi xhentëlmen meqë kanë ndodhur disa gjëra me femrat, periudhën e kaluar. Femrave duhet t’u kërkojmë ndjesë dhe kur kemi të drejtë. Respekti im është, unë di të kërkoj ndjesë për këdo dhe aq më tepër për femrat. Sepse në rininë time, të gjitha femrat që më janë afruar mua, kur kisha dhe kaçurrelat por kur kisha dhe paratë, kanë pirë më shumë whisky ose pije të mira sesa ujë. Faleminderit.’, dëgjohet të thotë Papa.
Kujtojmë se Kostaq Papa, mori mandatin më 8 Maj, pas djegies së mandateve nga “opozita e vjetër”. Ai ka hyrë në Parlament nga lista e Partisë Demokratike në Qarkun e Tiranës dhe është kreu i Partisë Emigracioni Shqiptar.
Kjo është hera e dytë që emri i deputetit bëhet lajm. Pak kohë më parë cv-ja e tij, u shpërnda gjerësisht në rrjete sociale për shkak të “aktiviteteve” të tij “kombëtare, mbarëkombëtare dhe ndërkombëtare”.
Në CV, Papa shkruante se ka eksperiencë pune si “Konsulent Juridik Ndërkombëtar”, “ Koordinator Universitar” dhe “Drejtues në Institucionet e Shoqërisë Civile”. Ndërkohë që si aktivitete shoqërore dhe politike shkruante se ka pasur “Në Institucionet Kombëtare e Mbarëkombëtare dhe Ndërkombëtare”. Pikërisht ky shënim, është bërë objekt i komenteve të shumta në rrjetet sociale./Opinion.al
