Dosja “Bajri” kthehet sërish në SPAK, vetëm një muaj pasi prokurorët e këtij institucioni e kishin dërguar atë në gjykatën e Shkodrës.
Por kjo e fundit ka shpallur moskompetencë, dhe e ka kthyer çështjen sërish në Prokurorinë Speciale, dosjen voluminoze në ngarkim të: Behar Bajrit, Enver Bajrit, Safet Rustemit, Ilir Rustemit, Emrah Plakut, Astmer Bilalit, Samet Hallunit, Ismet Idrizit, Sirjan Alija, Jorida Muratit, Senad Hallunaj, Florinë Hoxha dhe Mira Nikaj.
Kujtojmë se më 31 Janar 2020 Prokuroria Speciale shpalli moskompetencë mbi këtë dosje. Arsyeja e kthimit të dosjes në Shkodër lidhej me rrëzimin e akuzës për grup të strukturuar kriminal. Por tashmë, Gjykata e Shkodrës e dërgon sërish në SPAK.
Në shtator të vitit 2018, policia arrestoi 11 persona, shumica nga familja Bajri të cilët akuzohen për një sërë veprash penale si “Vrasje me dashje e mbetur në tentativë”, në bashkëpunim, “Vrasje me dashje”, e kryer në bashkëpunim, “Prodhim dhe mbajtje pa leje të armëve dhe municioneve luftarake”, “Organizim i llotarive të palejuara”, “Pastrim i produkteve të veprës penale” të kryer në bashkëpunim, “Shtrëngim me anë të kanosjes ose dhunës për dhënie të pasurisë”, kryer në bashkëpunim, “Përkrahje e autorit të krimit”, ‘Moskallëzim krimi”, “Prodhim e shitje e lëndëve narkotike”, të gjitha këto të kryera në kuadër të një grupi të strukturuar kriminal./Opinion.al
