Deputeti i PD-së, Oerd Bylykbashi, të mërkurën, prezantoi nismën e opozitës për vettingun e politikanëve në këshillin e legjislacionit për vetting në politikë.
Bylykbashi deklaroi se propozimi i opozitës është fare i thjeshtë: vetting me të njëjtin formulim ligjor si për prokurorët, gjykatësit dhe policët.
Trajtim special për politikanët nuk mund të ketë më! Ky shtet do mësojë t’i trajtojë të gjithë njësoj: si policin e thjeshtë, si ministrin e brëndshëm! Ky është parimi që kemi në Kushtetutë! Ky është parimi i Europës ku duam të bëjmë pjesë!
Sipas tij, ajo që është propozuar është amendimi i Kushtetutës për të sanksionuar vettingun politik.
Duke shtuar më tej, se pastaj duhet një ligj për të përcaktuar detajet si do realizohet vettingu.
Me miratimin e amendimit kushtetues ne do i paraqesim Kuvendit propozimin tonë ligjor si do bëhet vettingu.
Ky nuk është momenti për detajet teknike, por parimet kryesore si duhet të bëhet janë këto:
- Do të jetë një proces krejtësisht i pavarur dhe i palidhur dhe i pandikuar nga vetingu i drejtësisë.
- Do të jetë një model shumë më i thjeshtë dhe i qartë, afër modelit që u përdor për dekriminalizimin.
- Do të kryhet nga një strukturë profesionistësh krejtësisht të pavarur nga politika.
- Nuk mund të jetë kurrsesi një strukturë parlamentare dhe aq më pak një strukturë e përbërë nga përfaqësues partiakë: do ishte absurde dhe tallëse: politikanët do të jenë subjekt i vetingut dhe jo zbatues të vetingut.
- Do të ketë mbikqyrje ndërkombëtare.
