Presidenti i SHBA-së, Donald Trump, ka bërë me dije në një konferencë për mediat se një zgjidhje për luftën më shumë se katërvjeçare në Ukrainë po “po afrohet” dhe se ai do të flasë për Ukrainën gjatë bisedimeve në Turqi në samitin e NATO-s.
Trump i bëri këto komente pasi foli në fundjavë me Presidentin rus Vladimir Putin dhe homologun e tij ukrainas, Volodymyr Zelenskiy. Ai nuk dha asnjë arsye specifike për pohimin e tij se një zgjidhje për konfliktin ishte në horizont.
“Mendoj se jemi shumë më pranë zgjidhjes sesa e kuptojnë njerëzit. Presidenti Putin dëshiron që kjo të marrë fund. Këtë mund ta them me bindje të plotë. Ishte një bisedë e mirë. Edhe Presidenti Zelensky, dëshiron që kjo të përfundojë tani. Ne do të shkojmë në NATO dhe do të diskutojmë për këtë çështje. Dhe mendoj se do t’ia dalim; mendoj se do të arrijmë t’i japim fund. Ka qenë një situatë e tmerrshme. Mendoni pak: Ushtarë të rinj që shkojnë në luftë dhe vriten para se të përfundojë java e parë. Gjithçka lidhet me teknologjinë e dronëve. Ata janë makineri vdekjeprurëse. Është e pabesueshme. Fshihesh pas një peme dhe droni vjen e të gjen. Kam parë skena që nuk do të doja t’i shihja kurrë. Nuk do të doja që ju t’i shihnit ato në fushën e betejës. Dëgjojmë për Luftën Civile, dëgjojmë për të gjitha këto luftëra të ndryshme e të tmerrshme, por kjo është vërtet e llahtarshme”, tha Presidenti i SHBA-ve Donald Trump.
Në Moskë, zëdhënësi i Kremlinit, Dmitry Peskov, tha se besonte se qëndrimi i SHBA-së se si të zgjidhej konflikti mbeti i pandryshuar.
Por Zelenskyy, i intervistuar nga Financial Times, tha se besonte se presidenti i SHBA-së po e shihte konfliktin në një dritë të re duke pasur parasysh sukseset e fundit të Ukrainës.
Trump ka planifikuar të takohet me Zelenskin të mërkurën, në samitin e NATO-s në Ankara, ndërsa një zyrtar amerikan deklaroi se qëllimi i këtyre bisedimeve është një përpjekje e re për t’i dhënë fund luftës. I njëjti zyrtar tha se Trump ka gjasa të zhvillojë më pas një bisedë edhe me Putinin, pasi të ketë folur me Zelenskin, thekson Reuters.
Sakaq, bëhet e ditur se, ushtria ukrainase ka sulmuar përsëri Moskën me më shumë se 400 dronë. Që nga mbrëmja e së hënës, rreth 430 dronë janë lëshuar nga Ukraina drejt Moskës, deklaroi kryebashkiaku i kryeqytetit rus, Sergei Sobyanin, në mediat sociale të martën në mëngjes. “Shumica u neutralizuan nga mbrojtja ajrore në një distancë të madhe”, tha ai.
Ukraina ka intensifikuar sulmet e saj me dronë ndaj objektivave në Rusi, shumë larg vijave të frontit, në muajt e fundit. Sulmet e fundit të së martës në mëngjes ndodhën pak para fillimit të samitit të NATO-s në Turqi.
