Kreu i Bashkisë së Tiranës, Erion Veliaj, ka inspektuar këtë të martë lagjen e re “5 Maji”, një nga kantieret më të mëdha të Programit të Rindërtimit.
Kryebashkiaku Veliaj tha se apartamentet e reja për familjet e prekura nga tërmeti dhe banorët e zonës që do të strehohen aty, do të jenë gati shumë shpejt.
“Jam shumë krenar për punën e jashtëzakonshme që është bërë në lagjen “5 Maji”. Këtu nuk po ndërtojmë vetëm ndërtesa, por po ndërtojmë komunitet, hapësira, parkingje, gjelbërim dhe shkolla. Do të jetë padyshim lagjja më e bukur e Tiranës. Shumë njerëz do të lënë shtëpitë që i prishi tërmeti, për apartamentet e Boerit. Sigurisht, puna nuk ka shkuar fjollë, sidomos në Kombinat, ku kemi pasur një pafundësi gjyqesh absurde, kryesisht të stisur dhe të yshtur nga politika, po ashtu edhe te ‘’5 Maji”, me disa personazhe të OFL-së dhe çudira nga këto çudirat shqiptare, ku njerëz të implikuar në krime bllokojnë progresin e qytetit, apo parti humbëse sistematike i varin shpresat e tyre te sabotimi. Por, sabotimi nuk funksionon. Nuk funksionoi as te këndi i lodrave, as te sheshi, nuk funksionoi as te Astiri – shikoni si është çliruar hyrja e Tiranës ende pa përfunduar vepra – nuk funksionoi as te bllokimi që iu bë shkollës “Sami Frashëri””, tha Veliaj.
Më tej, ai nënvizoi se askush nuk mund ta ndalojë zhvillimin dhe progresin e qytetit të Tiranës. E rëndësishme, sipas Veliajt, është që të mbahen premtimet dhe të ecet përpara me punë.
“Ftesa për të gjithë ata që merren me politikë është të ofrojnë një alternativë tjetër, por të mos gënjejnë, të mos shpifin, të mos mashtrojnë, të mos hapin gjyqe dhe të mos inkurajojnë njerëz, duke i hedhur si mish për top nëpër gjykata. Përveçse e vonojnë, projektin nuk e ndalojnë dot. Sepse progresi nuk ndalohet dot”, tha ai.
Në fund, kreu i Bashkisë kishte një thirrje edhe për gjyqtarët që përpiqen të bllokojnë punën e Bashkisë së Tiranës për të çliruar varrezat e Sharrës nga zaptuesit. Ai paralajmëroi denoncim për këdo që po mundohet të bllokojë progresin e Tiranës.
“Ndjehem shumë i keqardhur që ka ende gjyqtarë, në pritje të Vettingut, që bllokojnë Bashkinë e Tiranës të çlirojë varrezat e “Sharrës”, dhe kur shikoj gjyqtarë të Gjykatës Administrative, që japin urdhëra bllokimi kundër punës së bashkisë. Flitet për varrezat e vjetra, që janë zaptuar duke ndërtuar mbi to shtëpi, të cilat bashkia ka 7 vjet që kërkon t’i largojë dhe gjykata thotë jo. Por, varrezat janë për të respektuar të parët tanë që nuk jetojnë më. Kurse në vitin 2022 kemi vendime gjykatash që bllokojnë bashkinë nga çlirimi i varrezave. Gjyqtarit nuk dua t’ia them emrin, por heshtja ime nuk do të zgjasë shumë. Në varreza do të përfundojmë të gjithë një ditë, por do të jetë për turpin e këtij gjyqtari që bllokon punën që bashkia të çlirojë varrezat. Këta i rrjepin njerëzit përkohësisht, derisa t’ju vijë Vettingu, por këta nuk do të vazhdojnë më në drejtësi sepse unë do të jem i pari që do të denoncoj një gjyqtar që bllokon çlirimin e varrezave, çlirimin e Liqenit, çlirimin e Liqenit të Thatë nga zaptimet m’u në mes ose në buzë të ujit. Vërtet na vonojnë punën, por nuk mund të na vonojnë pafundësisht. Qyteti do të vazhdojë të ecë përpara”, përfundoi Veliaj.
