Kryetari i Bashkisë së Tiranës, Erion Veliaj ka reaguar ndaj akuzave të bëra nga kryedemokrati Sali Berisha në lidhje me aksidentimin e një punonjësi të mbledhjes së mbetjeve në Sukth të Durrësit.
Gjatë mbledhjes së Këshillit Bashkiak të Tiranës, Veliaj tha se me rikthimin e Berishës dhe Metës rikthehet helmi dhe përçarja.
“Rikthimi i Saliut dhe Ilir Metës rikthen helmin, toksinat, ndasitë, përçarjen, shpifjen, lajmet e rreme në politikë. Luli mirë, keq, ishte pak fytyrë më civile, kurse këta janë komplet të pacipë. Mjafton të shikoni çfarë postonte Saliu dje. U çua e gjithë Shqipëria ta sqaronte që Sukthi nuk është fare në Tiranë, por në Durrës. Edhe po të ishte në Tiranë, kryetari i Bashkisë nuk rri pas çdo kazani plehrash apo pas çdo makinë industriale teknologjike që mbledh plehrat. Nëse ndodh një aksident është shumë e rëndësishme të hetohet, policia të bëje punën e saj”, u shpreh Veliaj.
Ndër të tjera kryebashkiaku Veliaj tha se Tirana sot ka një menaxhim shumë herë më të mirë të mbetjeve dhe ajër më të pastër.
“Histeria që do shikojmë tani do të jetë e ngjashme me ato që lamë pas. Nëse do flasim për pastrimin e Tiranës, ‘Il Meteo’, që është mjeti më praktik që e përdorin të gjithë si aplikacion, i merr të dhënat satelitore nga programi i Bashkimit Europian. Unë e pranoj se mund të rrëzojmë qeverinë e Sri Lanës dhe të Ruandës, por nuk beson njeri që ne kontrollojme edhe Brukselin”, deklaroi ai.
