Pas vdekjes së një 57-vjeçari, Prokuroria e Korçës ka hapur çështje hetimore për ‘mjekim të pakujdesshëm’.
58-vjeçari, Telha Kelo, sipas familjarëve u paraqit në spitalin e Korçës me dhimbje koke dhe të vjella dhe është trajtuar vetëm me një qetësues nga personeli mjekësor.
Sipas tyre ai duhej të nisej për të Tiranë në mënyrë që të merrte një trajtim të specializuar.
Familjarët e 57-vjeçarit të ndjerë u shprehën se fillimisht mjeku me iniciale P.M nuk tregoi për vdekjen e tij dhe më pas mohoi përgjegjësinë për atë çfarë ndodhi me të.
Njoftimi i policisë
Oficerët e Policisë Gjyqësore, referuan materialet hetimore në Prokurorinë pranë Gjykatës së Shkallës së Parë Korçë, për veprën penale “Neglizhencë në trajtimin mjekësor”, pas kallëzimit të bërë nga shtetasi V.K., 47 vjeç, i cili pretendon se si pasojë e mjekimit të pakujdesshëm të mjekëve në datën 13.11.2019, ka gjetur vdekjen vëllai i tij shtetasi T.K.,57 vjeç, banues në fshatin Pojan, Maliq, i cili rezultonte i shtruar prej dy ditësh në Spitalin Rajonal të Korçës, pasi kishte shfaqur probleme shëndetësore.
Në lidhje me këtë ngjarje u kryen të gjitha veprimet proceduriale, ku u sekuestruan në cilësinë e provës kartelat mjekësore të 57 vjeçarit, deklarimet e familjarëve të tij dhe të mjekëve të Spitalit, si edhe u dërguan vendimet e ekspertimit mjeko ligjor pranë IML-Tiranë, ku do të priten akt ekspertimet përkatëse për përcaktimin e shkakut të vdekjes të shtetasit T.K.
Materialet e para i kaluan Prokurorisë të Rrethit për veprime të mëtejshme hetimore./Opinion.al
