Numri dy i Lëvizjes Socialiste për Integrim, Petrit Vasili, i është drejtuar me një letër publike sot delegacionit të BE në Tiranë.
Në letrën e tij Vasili, i argumenton ambasadorëve se përse koncesioni i rrugës Milot-Balldren është një aferë korruptive. Si fillim thotë ai kjo rrugë është një kosot e shtuar në llogarinë e shtetit pasi ajo do të kushtonte më lirë nëse do të ishte ndërtuar nga shteti.
“Nga një rrugë që sipas parashikimit të vetë qeverisë do të kushtonte jo më shumë se 102 milion euro po ta ndërtonte vetë shteti, tani do të kushtojë në total rreth 260 milion euro, pra 2 herë e ca më shumë; si dhe çmimi që do të shkonte 6 milion euro kilometri po ta ndërtonte shteti, arrin në 15 milion euro sipas konçesionit”.
Megjithatë vazhdon Vasili, edhe vendimi për ta bërë këtë rrugë me PPP ka probleme të tjera korruptive të shtuara siç është rinegocimi i projektit dhe norma interesit 5% e cila nuk i përputhet interesit të eurobondit prej 3.55%.
Argumenti i fundit ka të bëjë me pamundësinë e kompanisë që ta ndërtojë rrugën pasi ajo nuk i ka burimet financiare
“Kompania kishte të ardhura prej 16 milionë eurosh në 2017-n dhe një fitim minimal prej më pak se 1 milion euro. Pra kompania s`ka absolutisht burime të mjaftueshme për një sipërmarrje të tillë.
Është aq e vërtetë sa qe edhe ne kontrate specifikohet qe vetëm vitin e trete kompania do te filloje te operoje me fondet e veta”.
Në fund ish deputeti i LSI i bën një apel të fortë përfaqësuesve të BE duke i tërhequr vëmendjen se drejtësia e re që sipas tyre po lind, është duke mos vepruar përballë këtyre skandaleve.
“Ju nuk i keni kursyer lëvdatat për një “drejtësi të re” që po lind. Por jam i shtrënguar t‘ju kujtoj se kjo ”drejtësi e re” ka mbyllur totalisht gojën përpara skandaleve të tilla flagrante dhe tronditëse. Ndaj është koha që ju të flisni sot” ka mbyllur letrën Vasili. /Opinion.al
