Nga Albatros Rexhaj
Valdrin Sahiti sapo ka prezantuar koleksionin e tij të ri, “Wedding 2017, ndërkaq për të promovuar atë ka angazhuar fotografin italian Eugenio Qose dhe modelin Mitia Breckenridge që ka pozuar për Armanin. Seti fotografik është realizuar në Apollonia.
Të dizajnosh fustane nusërie dhe kostume elegante për meshkuj di të jetë ankth në vete. Hapësira për të manovruar, për të krijuar diçka ndryshe, të veçantë, është shumë e vogël, pasi që në sytë e një vëzhguesi të jashtëm fustanet e nusërisë dhe kostumet elegante të meshkujve i ngjajnë njëra-tjetrës. Por, pikërisht aty ku të tjerët ngecin, Valdrin Sahiti gjen një mënyrë të re për të ecur para.
Koleksion i ri, “Wedding 2017”, përbën një ripërpunim të klasikes me dromca të trendeve aktuale, ndërkaq theksi kreativ bie mbi synimin që veshja të krijojë përshtypjen se, si dama ashtu edhe zotëriu, janë pjesë e natyrshme e crème de la crème të shoqërisë, qoftë së paku edhe për një ditë të vetme.
Edhe ky koleksion dëshmon se, jo rastësisht, Valdrin Sahiti është Prince of Albanian Fashion, aristokrat i mendimit kreativ dhe fanatik ndaj detajit, në krijimet e veta por edhe në mënyrën si i promovon ato.
Fotografi Eugenio Qose, i angazhuar nga Valdrini, për dallim nga shumë kolegë të tij, nuk e vë theksin te modeli, por kryekëput te produkti, pasi që në këtë rast subjekt trajtimi është veshja dhe jo modeli. Në fokusin e Eugenios, Mitia Breckenridge, që ka pozuar edhe për Armanin, dhe Dhurata Lipovica, që jo pa meritë e ka epitetin “nëna e engjëjve”, shkrihen natyrshëm brenda konceptit kreativ të Valdrinit. Dhe, duke e bërë këtë, një punë promocionale, tërësisht lineare, e mbulojnë me një vello të lehtë artistike, mjaftueshëm, sa për të provokuar ndjesitë.
