UEFA publikon rregullat, ja si gjenden biletat për në Euro 2016

TIRANE- Shqipëria për herë të parë në finalet e Europianit, një rast i jashtëzakonshëm për të gjithë tifozët për të brohoritur për përfaqësuesen e tyre dhe jo më për Italinë, Gjermaninë apo Holandën. Të paktën për 3 ndeshjet e grupit sportdashësit shqiptarë do të jenë me flamurin e tyre në tribuna. Por si mund të sigurohet një biletë? Ajo mund të bëhet prej 14 dhjetorit kur do të nisë edhe rezervimi i tyre në faqen e UEFA-s. Për të patur këtë mundësi duhet të zotërosh një pasaportë të Republikës së Shqipërisë, një kufizim për ata që nuk e kanë këtë dokument. Në radhë të parë duhet të zgjedhësh ekipin tënd. Çdo aplikues mund të kërkojë deri në 4 bileta për ndeshje, por kjo nuk do të thotë që detyrimisht e ka vendin e sigurtë në tribunë. Për këtë do të ketë një njoftim të dytë nga organizatorët. Çmimi i tyre për sfidat e grupit dhe fazës së pasardhëse janë 25 deri në 145 euro. numri i bleitave për tifozët shqiptarë për çdo ndeshje përcaktohet në bazë të kapacitet të stadiumit. Vera e ardhshme do të jetë tepër emocionuese për shqiptarët, por do të jetë akoma më e bukur për ta që do të ndodhen në stadiumet e Francës.