Aktualitet

U takuan në Holandë, si u zbulua “infermierja” që ndihmonte Behar Bajrin


               Publikuar në : 13:33 - 22/11/19 |
Opi Nion

Ditën e djeshme policia njoftoi se në kuadër të hetimeve ndaj grupit kriminal “Bajri”, ka zbuluar persona të tjerë të cilët janë anëtarë të këtij grupi.

Mes të arrestuarve është edhe 32-vjeçarja Jorida Muratin, banuese në Tiranë, por që rezulton se është e punësuar fiktivisht si infermiere në spitalin e Shkodrës. Sipas informacioneve, Behar Bajri ka ushtruar presion që Murati të punësohej në spitalin e Shkodrës, por pa shkuar në vendin e punës.

32-vjeçarja dyshohet për kryerjen e veprës penale “Vjedhje duke shpërdoruar detyrën”, kryer në kuadër të grupit të strukturuar kriminal. Gjykata i ka caktuar masën e sigurisë “Arrest në burg” dhe gjatë operacionit të djeshëm për ekzekutimin e masave të sigurisë, Policia ka ushtruar kontroll në banesën e saj ku ka gjetur një shumë prej 9 000 eurosh.

Por si ra në gjurmët e saj policia?

Sipas “News24”, Policia shqiptare nisi hetimet pas një takimi në Holandë mes Muratit dhe Behar Bajrit, i cili u arrestua në këtë vend dhe u ekstradua në muajin korrik në Shqipëri. Nga informacionet e marra nga autoritetet holandeze policia shqiptare ka mësuar se 32-vjeçarja Murati është takuar me Behar Bajrin në burg në një vizitë si e afërme e tij. Burimet thanë se mes tyre ka pasur një takim prej 3 orësh dhe nga përgjimi janë zbuluar të dhëna për hetimet. Dyshohet se Bajri i ka dhënë një letër me porosi, të cilat më pas Murati i ka zbatuar kur është kthyer në Shqipëri.

Sipas policisë, drejtuesi i grupit Behar Bajri ushtronte ndikim të paligjshëm në Spitalin Rajonal Shkodër, me qëllim që shtetasja Jorida Murati, e cila ishte e punësuar formalisht si infermiere në këtë spital dhe në të njëjtën kohë duke përfituar nga kreditimi i pagës. Nga hetimet e kryera, dyshohet se këta shtetas dhe 8 të tjerë, në bashkëpunimin dhe me njëri-tjetrin kanë përfituar shuma parash nëpërmjet kanosjes dhe shtrëngimit ndaj dy shtetasve./ Opinion.al

Pas