Një fëmije me autizëm i është kërkuar largimi nga klasa e dytë me kërkesën e prindërve të nxënësve të tjerë.
Ngjarja e rëndë ka ndodhur në shkollën “Skënder Çaçi”, Tiranë.
Mësohet se prindërit kanë firmosur një kërkesë disa ditë më parë në një mbledhje prindërish, organizuar vetëm për këtë qëllim, pa dijeninë e prindërve të fëmijës në fjalë dhe kanë kërkuar urgjentisht largimin nga shkolla të fëmijës me autizëm.
Në mbledhjen e organizuar, prindërit e fëmijës, nuk kanë qenë të pranishëm, pasi sipas tyre, një gjë e tillë nuk iu është komunikuar nga mësuesja e djalit të tyre.
Babai i fëmijës, tha për Opinion.al, se kjo që ndodh në shkollën “Skënder Çaçi” në Tiranë, ngjan me një komplot në kuptimin e plotë të fjalës, ndaj të drejtave të njeriut dhe kundra çdo lloj ndjenje humane, që vetë dija, pretendonte ta kishte instaluar në shoqërinë tonë.
Por historia nuk mbaron këtu.
Familjarët e fëmijës, bëjnë me dije se disa ditë më vonë është organizuar një tjetër mbledhje me iniciativën e prindërve të fëmijëve të tjerë, ku kësaj radhe kanë njoftuar edhe ata, por që nuk kanë refuzuar të shprehin përbuzjen ndaj një fëmije 9-vjeçar, autik, madje iu është dashur të dëgjojnë edhe fraza të tipit: “mos e sill në shkollë, por mbaje në shtëpi”, fjalë të cilat, janë vërtetë të dhimbshme për prindërit e fëmijës.
Siç duket, atyre nuk u kanë mjaftuar vetëm problemet me fëmijën e tyre të sëmurë, por tashmë, u janë shtuar edhe ankesat e prindërve të tjerë.
Ndërkaq, Drejtoria e Arsimore e Rrethit Tiranë, ka refuzuar në mënyrë të prerë kërkesën e prindërve të tjerë, për të përjashtuar nga shkolla djalin 9-vjeçar me autizëm.
Kërkesës së tyre, ajo i është përgjigjur me refuzim total, duke iu përmbajtur ligjeve ekzistuese që bëjnë të mundur qëndrimin dhe integrimin e fëmijës me autizëm në shkollën ku ai mëson prej tre vitesh.
Për ironi të fatit, muaji tetor, është muaji i sensibilizimit për fëmijët që lindin me sindromën down dhe atë të autizmit.
Pavarësisht kësaj, Shqipëria është ende e papërgatitur për pranimin e fëmijëve me probleme në gjirin e saj, ndërkohë që pjesa tjetër e botës, ka avancuar aq shumë me integritetin dhe mirëkuptimin e këtyre fëmijëve.
