Një 28-vjeçar shqiptar i shpallur në kërkim ndërkombëtar është arrestuar nga policia me qëllim ekstradimi drejt Italisë.
Bëhet fjalë për shtetasin O. L., 28 vjeç, banues në Memaliaj. I riu ishte shpallur në kërkim ndërkombëtar pasi Gjykata e Torinos, Itali, me vendimin e datës 17 nëntor 2021, i ka caktuar masën e sigurisë “Arrest në burg”, për veprën penale “Pjesëmarrja në grup kriminal me qëllim trafikimin e narkotikëve”, parashikuar nga legjislacioni penal i Italisë.
28-vjeçari dyshohet se nga viti 2017 deri në vitin 2019, ka qenë pjesë e një organizate kriminale me qëllim trafikimin e narkotikëve në katër shtete Hollandë, Gjermani, Spanjë dhe Itali dhe ka trafikuar sasi të konsiderueshme kokaine dhe marijuane që vinte në portet e ndryshme të Evropës.
Interpol Tirana, në bashkëpunim me autoritetet italiane, vijon procedurat për ekstradimin e tij.
