Trafikimi i të rinjve shqiptarë në Britani dhe futja e tyre në rrjetin e trafikut të drogës është një fenomen të cilit, tabloidi i njohur britanik, “The Sun” i ka kushtuar një artikull. Nëpërmjet dëshmive të disa të rinjve shqiptar aty tregohet se si ata kanë hyrë ilegalisht në Britani dhe janë bërë pjesë e grupeve të rrezikshme.
Jeta e shkurtër e Samet Matës është shumë traumatizuese. Ai ishte detyruar nga një baba i dhunshëm të lypë në rrugë që në moshën 11 vjeçare e më pas u trafikua në Britani nga një grup shqiptarësh. Tashmë në moshën 18 vjeçare, ai po përballet me vendimin e autoriteteve për t’u deportuar në Shqipëri.
Sameti mbërriti në Bristol 3 vjet më parë, i fshehur në një kamion për të punuar në aktivitete tw jashtëligjshme. Fati i tij ndryshoi kur ja doli të arratisej nga personat që e trafikuan dhe aktualisht ndodhet në një vend të sigurt, pranë një familje birësuese.
Por jo të gjithë shqiptarët e rinj që mbërrijnë në Britani janë po kaq me fat.
Endrit Vishaj hyri në Midland ilegalisht në moshën 16 vjeçare në Britani, i fshehur në një kamion. Tashmë ai po vuan një dënim prej 4 vitesh e 4 muajsh në burg për trafikim të kokainës. Ai u ndalua në një parkim makinash duke drejtuar një BMW, brenda së cilës policia gjeti 2 kg kokainë të pastër me vlerë 200 mijë paund dhe 55 mijë paund cash.
Të njëjtin fat kishte dhe 20 vjeçari Klevis Drazh, i cili u kap me 11 doza kokainë në Londër dhe u dënua me 18 muaj burg. Ai deklaroi para gjykatës se u detyrua nga një anëtar i mafias shqiptare të shiste drogë pasi kishte hyrë ilegalisht në Britani.
22 vjeçari Alfred Hamzaj u dënua me 8 muaj burg pasi u kap me 4 kg kanabis sativa në Dewsbury të West Yorkshire. Ai tregon se i hyri kësaj rruge pasi humbi punën e tij në një lavazh makinash për shkak të statusit të tij si emigrant ilegal.
Rastet e përmendura më lart po shtohen dhe shumë të rinj shqiptar po trafikohen në Britaninë e Madhe me premtimin se do të fitojnë mijëra paund nga shitja e lëndëve narkotike për grupe të caktuara.
“The Sun” ngre problemin se një numër “shokues” prindërish në Shqipëri po përpiqen që fëmijët e tyre adoleshent të hyjnë ilegalisht në Britani që t’iu bashkohen bandave të krimit të organizuar që kontrollojnë një pjesë të konsiderueshme të tregut të kokainës.
Sipas Agjencisë Kombëtare Kundër Krimit, 947 raste trafikimi janë referuar nga Shqipëria vetëm në vitin 2018, një rritje kjo me 50% që nga viti 2015.
Në vitet e fundit në Britani janë arrestuar dhe burgosur disa krerë të grupeve kriminale që trafikojnë drogë. Shqiptarët tashmë përbëjnë numrin e dytë të të huajve në burgje me 760 persona pas hekurave, 433 prej të cilëve janë dënuar për akuza të lidhura me drogën, duke u renditur kështu pas polakëve.
Disa familje shqiptare i dërgojnë fëmijët e tyre në Mbretërinë e Bashkuar dhe vende të tjera dhe për arsye të mira. Ata duan t’iu japin atyre mundësinë e një edukimi të mirë dhe një të ardhme.
Por kjo ka krijuar një treg fitimprurëse për bandat e kontrabandës, të cilët iu marrin familjeve deri në 15,000 paund për të kaluar fëmijët e tyre në Mbretërinë e Bashkuar. /Opinion.al
