Për përplasjet e ndodhura dje në KZAZ e Kamzës dhe të Vorës, policia ka arrestuar 3 persona dhe janë proceduar 34 të tjerë.
Sipas informacioneve të policisë në mes të personave të përfshirë në përplasjet në Kamëz kanë qenë dhe punonjës bashkie, ujësjellësi dhe të administratës. Gjithsej për tubimin e Kamzës janë proceduar 14 persona.
Gjithashtu edhe në Vorë policia ka konstatuar praninë e punonjësve të bashkisë dhe një numri personash ende të paidentifikuar. Për këtë tubim policia arrestoi tre persona dhe po procedon në gjendje të lirë 20 të tjerë.
Në lidhje me këto ngjarje policia ka sekuestruar në cilësinë e provës disa mbetje te kapsollave plasëse , shpërthyese si dhe flakadanë, si dhe nga pamjeve filmike të administruara nga ana e Policisë.
Akuzat që rëndojnë mbi të proceduarit janë “Organizimi dhe Pjesëmarrja në grumbullime dhe manifestime te paligjshme”, “Kundërshtimi i Punonjësve të Policisë së Rendit Publik”, “Goditja për shkak të detyrës”, “Prishja e qetësisë publike”, “Shkatërrimi i pronës” dhe “Mbajtja pa leje dhe prodhimi i armëve shpërthyese dhe municionit”.
Vijon puna për identifikimin e personave të tjerë të dyshuar për kryerjen e veprimeve të kundërligjshme dhe të akteve të dhunës pranë KZAZ-ve të qarkut Tiranë. /Opinion.al
