“Ne ju shohim, e dimë se çfarë po bëni dhe do të reagojmë!” Ky është mesazhi i fortë që Londra i ka dërguar sot Presidentit rus Vladimir Putin, teksa ministri britanik i Mbrojtjes, John Healy ka zbuluar një episod “të nxehtë” në det të hapur mes anijes ruse të spiunazhit “Yantar” dhe një nëndetëse të Marinës Mbretërore Britanike.
Ministri britanik, duke folur në Parlament, rrëfeu detaje nga incidenti me anijen ruse që besohet të jetë e specializuar në mbledhjen e inteligjencës rreth infrastrukturës kritike nënujore.
Së pari, John Healy konfirmoi se anija ruse Yantar hyri në Zonën Ekonomike ekskluzive të Britanisë të hënën më 20 janar.
“Gjatë dy ditëve të fundit, Marina Mbretërore ka vendosur fregatën HMS Somerset dhe anijen e patrullimit bregdetar HMS Tyne për të monitoruar anijen çdo minutë në ujërat tona”, tha ai.
Sekretari britanik i Mbrojtjes gjithashtu konfirmoi se ka miratuar ndryshimet në rregullore, duke i lejuar luftanijet britanike t’i afrohen më nga afër anijes dhe ta monitorojnë atë në mënyrë më efektive.
Më pas ai zbuloi një incident tjetër po me rusët, të ndodhur në nëntor të 2024, ku një nëndetëse britanike e “ndoqi” anijen në fjalë.
“E lejova nëndetësen e Marinës Mbretërore të shkonte pranë Yantar, rreptësisht si një parandalues, për të bërë të qartë se ne po vëzhgonim fshehurazi çdo lëvizje të saj”, tha ai.
Siç e përshkruan John Healy, nëndetësja u zhyt “në heshtje” pas Yantar dhe doli në sipërfaqe në një distancë goditëse të anijes ruse, për të sinjalizuar se Rusët ishin nën vëzhgim.
Incidenti i nëntorit përfshiu gjithashtu avionë patrullimi detar të Forcave Ajrore Mbretërore Britanike, të cilat siguruan që anija ruse të largohej nga ujërat e tyre.
“Ky është një shembull tjetër i rritjes së agresionit rus që synon aleatët tanë dhe ne”, tha ai, duke iu referuar incidenteve të dëmtimit të kabllove nënujore në Detin Baltik, të cilat dyshohet se janë bërë nga flota ruse në hije.
Duke iu drejtuar drejtpërdrejt Presidentit rus Vladimir Putin, Sekretari i Mbrojtjes i Britanisë tha: “Ne ju shohim. Ne e dimë se çfarë po bëni dhe nuk do të hezitojmë të reagojmë fuqishëm për të mbrojtur vendin tonë”.
Ai përsëriti angazhimin e Britanisë për të punuar me aleatët e NATO-s për të siguruar që anijet dhe avionët rusë të mos operojnë pranë territorit të NATO-s, e cila po ashtu ka nisur misionin Baltic Sentry për të mbrojtur infrastrukturën nënujore.
John Healy konfirmoi se Britania është e përgatitur të mbrojë sovranitetin e saj, duke theksuar se “Rusia është e rrezikshme, por thelbësisht e dobët”.
