Ndërkohë që nesër pritet të mbahet takimi Zelensky- Trump, në Uashington, presidenti ukrainas nuk do jetë vetëm në këtë takim. Në momentet e fundit, Presidentja e Komisionit Evropian Ursula von der Leyen ka njoftuar se ajo dhe “udhëheqës të tjerë evropianë” do të udhëtojnë gjithashtu për në Uashington DC nesër.
Në një postim në rrjetin social X, Presidentja e KE shkruan: “Këtë pasdite, do ta mirëpres Zelenskyn në Bruksel. Së bashku, do të marrim pjesë në Koalicionin e Vullnetit. Me kërkesë të Presidentit Zelensky, unë do t’i bashkohem takimit me Presidentin Trump dhe udhëheqës të tjerë evropianë në Shtëpinë e Bardhë nesër”.
Ndërkohë pak më parë është bërë me dije se kancelari gjerman Friedrich Merz do të udhëtojë për në Uashington të hënën për t’u bashkuar me bisedimet midis Zelensky dhe Trump, sipas një deklarate të re të lëshuar nga Qeveria Federale.
“Udhëtimi do të shërbejë si një shkëmbim informacioni me Presidentin e SHBA-së Donald Trump pas takimit të tij me Presidentin rus Vladimir Putin në Alaska”, tha zëdhënësi i kancelarit.
