Nga Mentor Kikia Sajmir Tahiri, në një lëvizje të detyruar, e dorëzoi mandatin e deputetit, duke e shndërruar këtë veprim në një ngjarje historike. Kultura e një vendi demokratik do ta kërkonte që ky veprim të ishte bërë që natën kur dolën përgjimet e para e që tregonin se Audi i famshëm i ish ministrit, herë transportonte cannabis e herë ministrin. Megjithatë, më mirë vonë se kurrë thotë populli dhe kjo vlen edhe për këtë rast.
Analistët i kanë hequr “këmbët” nga frenat dhe po fantazojnë të gjithë skenarët e mundëshëm të dorëzimit të mandatit. Ishte një vullnet qytetar i Tahirit? Ishte një kërkesë e Ramës? Apo një dorëzim pa kushte para presionit ndërkombëtar? Por, mendoj se ajo që është sot më e rëndësishme, është se çfarë do të ndodhë me hetimin. Dhe këtu topi është në fushën e prokurorisë.
Ka shumë njerëz që, për arsye politike, duan të shikojnë Sajmir Tahirin në burg. Ka shumë të tjerë që, për të njëjtat arsye, duan të shikojnë sërish në zyrë. Ndërsa ka shumë të tjërë që nuk duan as Tahirin në burg as Tahirin në zyrë, por të vërtetën mbi historinë dhe dyshimet për Tahirin. Ne duam të dimë nëse ka qenë apo jo Sajmir Tahiri i implikuar në trafikun e drogës, jo thjeshtë për tu futur në burg, por sepse ai ka qenë Ministri i Brendshëm i vendit tonë dhe ne duhet ta dimë se nga cilët njerëz jemi qeverisur. Ne duhet ta dimë nëse kupola e policisë ka qenë në anën e njerëzve apo në anën e trafikantëve, dhe sërish kjo, jo thjeshtë për të futur disa drejtorë policie në burg, por për të mësuar se kujt ua kishim besuar sigurimë tonë. Kurrupsioni ka qenë bashkëudhëtar i çdo qeverie në këto 28 vjet, por asnjëherë një Ministër i Brendshëm nuk është askuzuar apo dyshuar se ka qenë në krye të trafikut të drogës.
Prokuroria tashmë nuk ka asnjë pengesë ta bëjë punën e saj mirë. Ne nuk duam që ish ministri të shkojë në burg sepse kështu thotë Europa dhe SHBA, se na duhet një peshk i madh në burg. Besoj se Sajmiri nuk është gati që, për hir të negociatave, të flejë disa muaj tek 313-ta. Neve na duhet më shumë se kurrë drejtësia, që Tahiri të marrë atë që i takon, por më shumë se kaq, ky vend të mësojë të vërtetat e një historie që ka muaj që i ka zënë frymën politikës dhe medias. Dhe këtë duhe ta bëjë tani prokuroria. Jo duke ngritur akuza për arsye “integrimi” dhe as duke pushuar çështje për arsye proceduriale. Por duke zbardhur të vërtetën.
Ky do të jetë shansi jo për të dënuar një ministër të brendshëm që ta kemi për CV, jo për të festuar kapjen e një peshku të madh që ta tundim si sukses të reformës, por për të festuar fillimin e drejtësisë. Nëse kjo nuk do të ndodhë, prokurorja e përkohshme do të mbahet mend si njeriu që do ti japë shkelmin e parë drejtësisë se re që po përpiqemi të ndërtojmë.
