Disa persona u vranë dhe disa të tjerë u plagosën të mërkurën në mëngjes, kur një njeri i armatosur hapi zjarr në një kompleks për parkimin e tramvajeve në San Hoze të Kalifornisë, thanë autoritetet.
Zëvendës Sherifi i Qarkut të Santa Klarës, Russell Davis, u tha gazetarëve se bëhej fjalë për “viktima të shumta” por se do të duhej kohë për të specifikuar se sa njerëz ishin vrarë. Personi që shtiu ka vdekur, tha ai.
Ngjarja ndodhi në një parkim tramvajesh të administruar nga Autoriteti i Transportit Santa Clara Valley, pranë aeroportit kryesor të qytetit dhe disa “disa persona janë duke u trajtuar”, shkroi Kryebashkiaku Sam Liccardo në Twitter.
“Personi që shtiu nuk është më kërcënim dhe objekti është evakuuar,” shkroi ai.
San Hozeja, një qytet me rreth 1 milion banorë, ndodhet në zemër të Luginës së Silikonit (Silicon Valley), një qendër globale e novacionit teknologjik dhe aty kanë selinë disa prej kompanive më të mëdha të teknologjisë në SHBA.
Një bashkëpunëtor i televizionit ABC News raportoi se ndërtesa nuk ishte e hapur për publikun, prandaj personi që shtiu do të ketë patur nevojë për ndihmë nga brenda për të hyrë. Parkimi është një kompleks ndërtesash industriale, pranë shinave hekurudhore.
