Sekretari Amerikan i Shtetit, Antony Blinken, ka telefonuar Kryeministrin Edi Rama pas vendimit të marrë nga shteti shqiptar për strehimin e afganëve në vendin tonë.
Lajmi është bërë i ditur nga Departamenti Amerikan i Shtetit, me anë të një njoftimi në faqen zyrtare.
Sipas DASH, Blinken ka falenderuar kryeministrin Rama për vazhdimin e traditës krenare të Shqipërisë për strehimin e njerëzve në nevojë. Më tej në njoftim thuhet se Sekretari Amerikan dhe Kryeministri Rama riafirmuan partneritetin e ngushtë midis SHBA dhe Shqipërisë.
Njoftimi nga DASH
“Sekretari i Shtetit Antony J. Blinken bisedoi dje me Kryeministrin shqiptar Edi Rama. Sekretari dhe Kryeministri u konsultuan mbi ofertën e aleates NATO-s, Shqipërisë, për të strehuar afganët në nevojë.
Sekretari Blinken falënderoi kryeministrin Rama për vazhdimin e traditës krenare të Shqipërisë për strehimin e njerëzve në nevojë. Sekretari dhe Kryeministri riafirmuan partneritetin e ngushtë midis dy vendeve tona”, është ky njoftimi nga Departamenti Amerikan i Shtetit.
Sakaq, Sekretari Amerikan i Shtetit ka zgjedhur që të falenderojë Kryeministrin Edi Rama edhe në një postim në rrjetin social Twitter.
“Faleminderit Edi Rama për ofertën e Shqipërisë për të siguruar strehë të sigurt për afganët në nevojë. Shumë mirënjohës për partneritetin e fortë midis Shteteve të Bashkuara dhe aleatit tonë në NATO”, shkruan Blinken./Opinion.al
