Nëse Lacio duke luftuar për zonën Champions në kampionat, ka fituar grupin e Ligës së Europës duke u kualifikuar si e para, ka siguruar pjesëmarrjen në gjysmëfinalet e Kupës së Italisë, ka fituar Superkupën e Italisë, nuk është meritë e lojtarëve të kalibrit Milinkoviç- Saviç, Luis Alberto apo Çiro Imobile, por edhe e atij që mbulon rolin më të vështirë në një skuadër futbolli dhe që është rritur në ekipine të rinjve të Simone Inzagit.
Pati një aventurë të shkurtër në Serinë B me Salernitanën dhe në fund arriti të bënte realitet ëndrrën e tij për të debutuar në Serinë A. Për më tepër ka marrë rolin e portierit titullar te Lacio dhe nuk e lëshon më.
Po flasim për Thomas Strakoshën, 22- vjeçarin shqiptar. Djaloshi i talentuar, i cili po shkëlqen dhe është një siguri për lacialët. Pritjet e tij kanë qenë vendimtare dhe kontribut i madh për arritjen e rezultateve të ekipit bardhekaltër. Kujtojmë këtu pritjen e penalltisë të Dibalës apo ndërhyrjen vendimtare kundër Kiezës që i dha Lacios kualifikimin në gjysmëfinalen e Kupës.
MË MIRË SE DONARUMA
Nuk merr 6 milionë euro në vit, por Thomas Strakosha është i pari në renditjen e portierëve të rinj më të mirë të sezonit. Pritjet e tij (67) i japin vendin e parë, ndërsa Dunaruma gjendet i pesti në klasifikimin e përgjithshëm me 45 pritje. Në podium janë Alban Lafont, portieri i Tuluzës me 62 pritje dhe Kamara i Salsburgut me 49. Thomas është portieri i ri më i mirë në Europë duke marrë në analizë kampionatet më të mëdha të kontinentit. Një kënaqësi e madhe për portierin, por mbi të gjitha edhe për Lacion që po rrit një kampion të këtij lloji.
I DHJETI NË EUROPË
Por si pozicionohet Strakosha në klasifikimin e të gjithë portierëve në Europë? Mesatarisht bën më shumë pritje se David De Gea i Mançesterit apo sesa Ter Shtegeni i Barcelonës, apo Burki i Dortmundit. Kjo do të thotë se pritjet e portierit shqiptar janë superiore në krahasim me shumë portierë të tjerë europianë dhe për momentin gjendet në vendin e 10-të me një mesatare 3.9 pritje për ndeshje. Në Serina A ka luajtur 17 ndeshje dhe 1530 minuta.
SI ORGANIZATOR
Mes portierëve të rinj, Strakosha është përpara Donarumës edhe për mesataren e pasimeve për ndeshje: 28.4 kundër 26.9 të milanistit. Po në krahasim me të mëdhenjtë? Gjendet përpara portierit të Romës, Alison (27.6), Kurtua (27.2), De Gea (26.7), Reina (26.5). Edhe pse mbi shpatulla nuk ka shumë vite, topi qarkullon shpesh në zonën e tij dhe bën që shqiptari të jetë në qendër të lojës së Lacios.
PASIMET E GJATA
Është i saktë me pasimet e shkurtra, por nuk gabon as kur topin e godet me forcë dhe kërkon të gjejë shokët e skuadrës në gjysmëfushën kundërshtare. Një fakt interesat: Thomas Strakosha kryen më shumë pasime të gjata të sakta sesa De Gea, portieri i Mançesterit që konsiderohet si një nga më të mirët në botë. Statistikat e thonë qartazi: 8.5 për shqiptarin dhe 8 për spanjollin. Pa llogaritur pastaj të tjerët si Alison (7.7 pasime të gjata për ndeshje) apo Donarumën 6.1. Talenti shqiptar në këtë klasifikim është edhe përpara Ter Shtegenit apo Çehut. Përveç pritjeve, Strakosha është i saktë edhe me këmbë. Pasimet e tij mbërrijnë shpesh në kokën e Milinkoviç-Saviçit.
FORMACIONI I SEZONIT
Nuk mund të mungonte vlerësimi as brenda kampionatit italian për Thomas Strakoshën. Sipas “Whoscorded.com”, ai është portieri më i mirë në Serinë A për gjysmën e parë të sezonit. Portieri i Kombëtares shqiptare ka arritur të thyejë konkurrentët duke marrë mesataren më të lartë të notave deri tani, 7. Ndërkohë Lacio në këtë formacion përfaqësohet nga 3 lojtarë si surpriza e këtij sezoni. Meritat u njihen shpeshherë sulmuesve, por portieri i Inzagit duhet vlerësuar që në vitin 2017 ka dhënë më të mirën, madje duke debutuar edhe me Kombëtaren shqiptare. Ai është në gjurmët e të atit. / Panorama
