Rajoni

Stoltenberg:Në Serbi, NATO-ja vazhdon të kujtohet për bombardimet e 1999-s


               Publikuar në : 15:29 - 10/06/19 |
el ida

Sekretari i përgjithshëm i NATO-s, Jens Stoltenberg, në një intervistë për gazetën beogradase “Politika” tha se NATO-ja e respekton plotësisht politikën e neutralitetit të Serbisë, megjithatë sipas tij partneriteti i aleancës me Serbinë është i mirë për vetë Serbinë, për Ballkanin Perëndimor dhe për NATO-n.

Stoltenberg shtoi se e di se në Serbi, referimi ndaj NATO-s vazhdon të nxisë kujtime për bombardimet e vitit 1999. Asokohe, NATO-ja ka bombarduar caqet e ushtrisë serbe për të ndaluar dhunën e regjimit serb në Kosovë, dhe sipas Stoltenberg motivi kryesor i ndërhyrjes ka qenë ndalimi i katastrofës humanitare në Kosovë.

Stoltenberg tha se bashkëpunimi i ardhshëm i NATO-s me Serbinë do të zhvillohet duke nisur nga reforma e sektorit të sigurisë deri te ndihma në rast të fatkeqësive dhe asgjësimi i municioneve të tepërta.

Ai kujtoi se në tetor të vitit të kaluar, Serbia ka organizuar një stërvitje civile emergjente, të quajtur “Serbia 2018”.

“Ky ushtrim i ka ndihmuar aleatët e NATO-s, si dhe Serbinë dhe partnerët e tjerë, që të bëhen më të përgatitur për të vepruar në rast të fatkeqësive natyrore, siç janë përmbytjet dhe tërmetet”, tha Stoltenberg./Opinion.al

Pas