Pas reagimi të kreut të opozitës Lulzim Basha se vendimi i KQZ-së për heqjen e mandatit të Agim Kajmakut është një turp për Partinë Socialiste, ka reaguar Ministrja për Marrëdhëniet me Parlamentin, Elisa Spiropali.
Ajo deklaron se Partia Socialiste nuk mban asnjë përgjegjësi për shkelësit e ligjit brenda saj përveç mos marrjes së tyre në mbrojtje. Ky sipas Spiropalit është një standard të cilin ajo shkruan se kreu demokrat nuk mund ta kuptojë pasi ai është “abuzues kronik i besimit të zgjedhësve të PD” sipas saj.
Spiropali nuk ka komentuar vendimin e KQZ për shkarkimin e Agim Kajmakut por i ka kujtuar kreut të opozitës se ai është “i pandehur në prokurori për pastrimin e parave në emër të Partisë Demokratike” dhe për këtë duhet të provojë pafajësinë e tij.
“Lulzim! Ti je një i pandehur në prokurori dhe si fillim duhet të provosh pafajësinë tënde për pastrimin e parave në emër të Partisë Demokratike dhe pastaj të hapësh gojën e të japësh mendjen që nuk e ke për Partinë Socialiste!
Partia Socialiste nuk mbron askënd që shkel ligjin dhe nuk mban asnjë përgjegjësi tjetër përveç respektimit të këtij standardi në raport me çdo shkelës, që abuzon me ligjin dhe me besimin e zgjedhësve të saj! Por ty si abuzues kronik i besimit të zgjedhësve të PD nuk ka se si ta rrok mendja këtë standart, prandaj është e kotë të harxhojmë më shumë se disa pak fjalë me ty dhe me shumicat, fitoret e zgjedhjet e tua imagjinare!” shkruan Spiropali. /Opinion.al
