Andrea Agostinelli është fituesi i duelit të strategëve italianë në Korçë. Skënderbeu fitoi minimalisht përballë Teutës së debutuesit Roberto Çevoli, falë një goli të realizuar në kohën shtesë. Një sukses me të cilin kampionët e Shqipërisë barazuan ecurinë rekord të edicionit të kaluar, me 6 fitore radhazi në 6 javët e para.
Miqtë mund të kishin befasuar prej sekondave të para, por reflekset e portierit Shehi neutralizuan devijimin e Faisal Bangal. Skënderbeu reagoi menjëherë me Salihin, që nuk shfrytëzoi pasigurinë e mbrojtjes durrsake, pas harkimit të Radas nga goditje standarde. Një episod që shqetësoi trajnerin e ri të bregdetarëve, Çivoli frika e të cilit u konfirmua pak çaste më vonë. Në të 12-ën Shkalla nuk arriti të largonte topin pas harkimit të Latifit, duke i paraqitur Xhemjs një shans të shkëlqyer për të shënuar, por ishte sërish mbrojtësi i Teutës ai që evitoi golin.
Sulmet e Skënderbeut nuk u ndalën, përkundrazi korçarët vazhduan të kërkonin me ngulm golin e avantazhit. Pas tentativës së pasuksesshme të Latifit, ishte shtylla ajo që prishi festën e Radas, me portierin Moçka që ishte i mposhtur. Në vazhdim të aksionit Xhejms kishte një tjetër mundësi për ta dërguar topin në rrjetë, por sulmuesi nigerian gaboi gjithçka edhe pse ishte i vetëm përpara portës.
Pas thuajse 30 minutave e mbyllur në mbrojtje, Teuta provoi të rrezikonte, fillimisht me goditjen nga distanca të Faisal Bangal dhe pak sekonda më pas me Andi Ribajn, që pas shkëputjes së shpejt nga e majta provoi nga pozicion thuajse i pamundur, me Shehin që kontrolloi topin. Skuadrat shkuan në pushimin ndërmjet pjesëve me Skënderbeun gjithmonë në sulm dhe një tjetër tentativë të pasaktë nga Xhejms.
Kampionët në fuqi vijuan ofensivën edhe në fraksionin e dytë të lojës, me Salihin që fillimisht provoi nga jashtë zone ndërsa në të 65-ën sulmuesi nuk arriti të shfrytëzonte daljen e pasigurt të Moçkës. Në vazhdim të aksionit nga goditje këndi, ishte Latifi ai që provoi pa sukses.
Me Skënderbeun të hedhur të gjithin në sulm, Teuta provoi të shfrytëzonte hapësirat e krijuara, me dalje të shpejta nga e majta. Fillimisht Osmani rrezikoi autogolin në tentativën për të spastruar zonën, ndërsa në të 70-ën Ribaj nuk finalizoi si duhet aksionin e durrsakëve.
Një episod i diskutueshëm i sfidës ishte ai i minutës së 77-të, me Latifin që pretendoi 11-metërsh, por gjyqtari Olsi Sokoli vazhdoi lojën. Korçarët pretenduan për penallti edhe pak sekonda më pas me Latifin, ndërsa edhe Nimaga i aktivizuar nga stoli iu shtua listës së lojtarëve që nuk arritën ta dërgonin topin në rrjetë.
Emocionet vazhduan edhe në pesë minutat e fundit të sfidës, me portierin Shpëtim Moçka që realizoi tre ndërhyrje vendimtare duke mos lejuar rrjetën e Teutës të prekej. Fillimisht gardiani neutralizoi goditjen e Salihit, ndërsa pak sekonda më pas ishte me fat në tentativën e Xhemjs, me topin që i’u përplas në këmbë
Në minutën e 87-të, Skënderbeu pretendoi sërish 11-metërsh me Latifin, por gjyqtari Sokoli vazhdoi lojën mes kontestimeve të korçarëve. Dy minuta nga fundi i lojës, Moçka realizoi edhe mrekullinë e tretë, duke neutralizuar një gol të sigurt pas goditjes me kokë të Hamdi Salihit. Vështrimi i bomberit shkodran për ndërhyrjet e pabesueshme të portierit ishte treguesi më i mirë i vuajtjeve të korçarëve. Për të zgjidhur ndeshjen mendoi Bakary Nimaga, i aktivizuar nga stoli në minutat e fundit, me rrjetën e realizuar në minutën e 5-të të kohës shtesë. Një çlirim për Skënderbeun, mbi të gjitha për trajnerin Agostinelli, që fluturoi nga gëzimi, ashtu si Skënderbeu kryesues fluturoi me 8 pikë diferencë nga ndjekësit. Me një ritëm të tillë, vështirë se gara për titullin do të vazhdojë gjatë. /gazetashqip
