Të tjera detaje janë zbuluar rreth sasisë së kokainës së gjetur në kontenierin me banane në Vaqarr. Mësohet se 119 kilogramë kokainë kanë ardhur bashkë me kontenierin me banane të porositur nga një kompani në vendin tonë.
Gazetarja Klodiana Lala ka raportuar se kontenieri me banane ka ardhur nga Ekuadori në Itali, në Goia Toauro, ndërkohë që autoritetet italiane nisën dyshimet pasi konstatuan se mungonte plumbçia, që mbyll ngarkesën.
Pasi është hapur kontejneri, është konstatuar se mungojnë disa paleta me banane. Autoritetet italiane kanë dyshuar se në këto kuti që mungojnë, ka pasur një sasi të madhe lënde narkotike dhe janë duke hetuar atje për të parë nëse autorët e dyshuar janë filmuar nga kamerat e sigurisë.
Më pas kontenieri ka marrë rrugën dhe ka ardhur në Durrës. Lala raporton se në Romanat kanë dalë personat e paidentifikuar që të marrin drogën, por policia nuk e beson se ata kanë arritur që ta gjejnë këtë sasi. Pas këtij momenti kompania ka informuar policinë.
Ndërsa sot Policia e Shtetit informoi se janë sekuestruar 119 kilogramë lëndë e dyshuar narkotike kokainë, ndërsa janë ndaluar 3 shtetas.
Konteineri ka mbërritur në portin e Durrësit dhe pas veprimeve të zhdoganimit dhe kontrollit në skaner ka rezultuar i pastër dhe ka dalë nga porti, me destinacion magazinat e firmës në periferi të qytetit të Tiranës./Opinion.al
