Një ditë pas publikimit të skandalit të mbetjeve spitalore, të cilat rezultuan se nuk asgjësohen por hidhen në lumin Erzen duke shkaktuar ndotje me përmasa të mëdha, Opinion.al sjell qëndrimin e emisionit që hodhi dritë mbi ngjarjen, emisionit “Stop” në TV Klan.
Në një reagim të fortë, redaksia e këtij emisioni kërkon që të arrestohet Mirela Topulli, administratorja e kompanisë “Euroteam” që goditi gazetarin në krye të detyrës.
Sakaq redaksia e “Stop” u bën thirrje qytetarëve që të lënë rrjetet sociale dhe të reagojnë fortë duke shkundur institucionet shtetërore që nuk kontrollojnë veprimtarinë e kompanive që marrin miliona dhe veprojnë lirisht duke kërcënuar seriozisht jetët tona.
Pyetje: Emisioni “Stop” ka transmetuar mbrëmë një investigim që zbulon skandalin e përmasave të mëdha. Ndotjet e mjedisit nga mbetjet spitalore. Si keni rënë në gjurmët e këtij skandali dhe sa kohë i është dashur stafit tuaj për të mbledhur faktet?
Stop: Kishim disa indicie për këtë, që mund të quhet pa frikë mega-skandal, ose krim kundër njerëzimit. Banorët e zonës na kishin sinjalizuar e po kështu kolegë të mediave të ndryshme ishin përpjekur të hetonin në këtë drejtim. Por sesi ndodhte, që “Euroteam” i mbyllte gjithmonë problemet me ndonjë gjobë modeste..?! Prej disa javësh gazetari i emisionit “Stop” ndiqte këtë çështje të nxehtë, që na prek të gjithëve jo vetëm si gazetarë, por edhe si qytetarë.
Pyetje: Pamjet që transmetoi “Stop” janë trishtuese. Aty marrin përgjigje shumë pyetje mbi rritjen e vdekshmërisë nga sëmundjet e pashërueshme. Çfarë impakti ka patur. Pra a keni marrë ju reagime nga qytetarët?
Stop: Impakti i njerëzve ka qenë disproporcional, në kuptimin që shikuesit, shpërdarësit dhe komentuesit në rrjetet sociale kanë vërshuar lumë. Por nga ana tjetër asnjë lëvizje shoqatash apo organizatash, që marrin para projektesh ambienti, apo thjesht njerëz me sensibilitet qytetar, nuk u ngrit, të kërkonte llogari nëpër institucione. Por ata, që përfshihen në replika, që ndryshojnë asgjë, kanë qenë të panumërt. Është koha të kujtojmë që nuk mjafton të shfryjmë, ku të mundim, por të marrim në dorë jetën tonë. Mbetjet e rrezikshme spitalore po hidhen në brigjet e lumenjve, dhe të nesërmen jeta vijon normalisht, me shtetarë, që “krihen” nëpër ekrane, edhe pse helmet u shkojnë edhe atyre në tepsi, në tavolinat e drekave e darkave luksoze…
Pyetje: Po institucionet shtetërore a kanë reaguar. Drejtuesi i emisionit bëri thirrje Ministrinë së Shëndetësisë, asaj të Mjedisit dhe Prokurorisë. A keni ende sot reagimet zyrtare të tyre?
Stop: Ministria e Mjedisit reagoi më shpejt, me gjobë dhe pezullim aktiviteti. Po sigurisht, që nuk mjafton. Gjoba në koncept ka të bëjë me rastin, kur duke punuar edhe gabon. Por ajo, që shqiptarët panë me zë dhe figurë, ishte as më shumë e as më pak, sesa KRIM KUNDER NJEREZIMIT. Atë, që Siria apo Koreja e Veriut, po e bën me armët kimike, “Euroteam” e simotrat e saj, po e bëjnë duke na hedhur flakonë gjaku të infektuar dhe shiringa e serume të përdorur në lumenj. Çdo reagim do të ishte i mangët. Në çdo vend të botës, do të ngrihej në këmbë shteti e qeveria dhe dorëheqjet e ministrave të linjës, do të ishin minimumi i padiskutueshëm. Edhe 24 orë pas transmetimit të skandalit, Ministria e Shëndetësisë nuk ka asnjë reagim. Por kontratat e “Euroteam” me të dhe të gjithë spitalet e klinikat në vend, numëronin miliona euro dhe pa i kontrolluar askush… Është pak të thuash makabre…
Pyetje: A do ta vazhdoni këtë temë, pasi duhet thënë se keni kaluar një moment në vështirë, pasi gazetari juaj u dhunua në krye të detyrës?
Stop: Sigurisht që kjo temë dhe tema të tilla që kanë të bëjnë me jetën e shëndetin e njerëzve, do të vazhdojnë dhe do të thellohen. Gazetari i “Stop”, Genci Angjellari u dhunua në detyrë nga administratorja e “Euroteam”, Mirela Topulli, por ky moment ishte vetëm “qershia mbi tortë” e megaskandalit të mbetjeve të rrezikshme. Pavarësisht të gjithave, asgjë nuk na ndal t’u shkojmë të vërtetave deri në fund.
Pyetje: A e ka arrestuar policia dhunuesen Mirela Topulli? Dhe a keni një apel publik për atë që guxoi të ngre dorë mbi gazetarin?
Stop: Apeli ynë si gazetarë dhe qytetarë: Lajmësi nuk goditet! Ndërsa policia, që duam, nuk është ajo, që krekoset kur i vizitojnë kryeministra, por ajo që na mbron jetën, pronën e të drejtat. Policia, që shpall në kërkim dhunues e ata bredhin lokaleve, nxit vetëm vetëgjyqësi. Ndërsa për reagimin qytetar: Mjaf me rrjete sociale, duhet të marrim jetën tonë në dorë. Njerëz, po na vrasin e po bëjmë sehir! Deri kur?!
/Riviera Dedaj-Opinion.al
