Bota

Situatë e rënduar nga COVID në SHBA


Bëhu pjesë e Grupit Zyrtar të Opinion.al
>> KËTU <<
               Publikuar në : 21:17 - 03/01/22 |
Opi Nion

Vala e pestë e pandemisë së koronavirusit vazhdon të përhapet në mbarë botën, duke infektuar si të pavaksinuarit ashtu edhe të vaksinuarit. Varianti i ri, Omicron, shkaktoi anulimin e mijëra fluturimeve në vitin e ri në Shtetet e Bashkuara. Presidenti Joe Biden ka premtuar sigurimin e gjysmë miliardi testeve të shpejta, ndërsa nxënësitë amerikanë rikthehen në klasa.

Më shumë se 9 mijë e 200 fluturime të brendshme dhe ndërkombëtare në ShBA u vonuan ose anuluan ditën e Vitit të Ri, për shkak të motit të keq dhe shtimit të rasteve me variantin Omicron të koronavirusit. Kjo sipas faqes së internetit që ndjek fluturimet, “Flight Aware”.

Deri të dielën, u anuluan edhe 2200 fluturime tjera. Aeroporti Chicago O’hare ishte i mbushur me udhëtarë në pritje.

“Kur po udhëtoja vitin e kaluar, këtu nuk kishte njeri, dukej e frikshme. Por edhe pse më pëlqen të shoh njerëz, ky është një numër shumë i madh”, thotë Sylvia Robinson, udhëtare nga Hjustoni.

Ndërsa të infektuarit me variantin Omicron kanë më pak shanse të sëmuren rëndë, këshilltari kryesor i presidentit amerikan për pandeminë, Dr. Anthony Fauci, paralajmëron se shtimi i infeksioneve kërcënon gjithë sistemin e kujdesit shëndetësor.

“Edhe nëse një përqindje më e vogël përjeton sëmundje të rëndë, kur infektohen shumë njerëz, rritet numri i atyre që do të kenë nevojë të shtrihen në spital. Kjo është arsyeja që ne shqetësohemi për gjendjen e spitaleve”, tha eksperti kryesor i sëmundjeve infektive.

Në periudhën kur nxënësit amerikanë kthehen në mësime, mesazhi i zotit Fauci mbetet i qartë.

“U bëj thirrje prindërve që të shqyrtojnë seriozisht vaksinimin e fëmijëve, mbajtjen e maskave në mjediset e shkollës, kryerjen e testeve për të ndalur përhapjen e infeksionit. Mendoj se me të gjitha këto masa, është i sigurt kthimi në shkollë i fëmijëve”, tha ai.

Kryebashkiaku i ri i qytetit të Nju Jorkut, Eric Adams, i cili bëri betimin të shtunën, tha për rrjetin ABC se qyteti më i madh i vendit është gati për rifillimin e mësimit.

“Përmes testimeve do të krijojmë një mjedis të sigurt. Do të identifikojmë fëmijët që janë ekspozuar ndaj virusit dhe do t’i largojmë nga shkolla. Të dhënat tregojnë se ekspozimi i një fëmije nuk nënkupton se e gjithë klasa është ekspozuar”, tha zoti Adams.

Ai e merr drejtimin e Bashkisë së Nju Jorkut në një kohë kur qyteti përballet me një numër rekord rastesh të shkaktuara nga varianti Omicron. Nga e hëna mësimet rifillojnë në të gjithë vendin.

 

Pas