Ministri i Jashtëm i Iranit, Mohammad Javad Zarif tha se Irani nuk do të negociojë me Presidentin Donald Trump nëse ai nuk tregon respekt ndaj Teheranit duke ju përmbajtur zotimeve të dakortsuara në marrëveshjen nukleare të shumëpërfolur.
Në një intervistë ekskluzive për CNN, Zarif paralajmëroi se “SHBA po luan një lojë shumë, shumë të rrezikshme” me shtimin e prezencës ushtarake në rajon.
Zarif kritikoi veprimin e SHBA që dërgoi aeroplanmbajtësen ‘USS Abraham Lincoln’ dhe një skuadër bombarduesish në Gji. “Prania e gjithë kësaj force ushtarake në një zonë kaq të vogël mund të shkaktojë aksidente. Në këto raste duhet shumë maturi nga SHBA e cila po luan një lojë shumë të rrezikshme”, tha Zarif.
Ministri Iranian akuzoi Washingtonin se ishin ata të parët që dolën nga Plani i Përbashët i Veprimit. Kjo marrëveshje e 2015 synonte të limitonte kapacitetet nukleare të Iranit kundrejt heqjes së sanksioneve ekonomike nga SHBA.
“Ne vepruam se patëm besim. Tashmë nuk jemi më të gatshëm të flasim me persona që nuk mbajnë premtimet” tha Zarif për marrëveshjen e nënshkruar nga SHBA, Iran, Britania e Madhe, Kina, Franca, Gjermania dhe Rusia.
Të dielën Presidenti Trump ashpërsoi retorikën e tij ndaj Iranit duke thënë se, “Nëse Irani do të luftojë, atëherë ky do të jetë dhe fundi zyrtar i Iranit. Mos kërcënoni kurrë SHBA-të”.
Mbi këto deklarata Zarif tha se “Irani asnjëherë nuk negocion me zor. Nuk mund ti bësh kërcënime Iranit dhe pastaj të presësh që ne të tregojmë vullnet të mirë. Gjërat bëhen nëpërmjet respektit dhe jo kërcënimeve”. /Opinion.al
