Gjatë ditëve të fundit është shënuar një rritje e rasteve të reja me Covid-19 në vendin tonë. Rritja ka patur ritme edhe më të larta se në kohën e pikut të pandemisë duke regjisturar rreth 86 raste në dy ditët e fundit.
Problematike është paraqitur situata brenda QSUT në Tiranë ku një numër mjekësh, infermierësh dhe personeli shëndetësor rezultuan disa javë më parë të infektuar. Për pasojë, disa pacientë që ndodheshin në spital ishin infektuar dhe pasi ishin kthyer në qytetet e tyre krijuan atje vatra të reja, gjë që u ndihmua edhe nga heqja e masave bllokuese.
Lidhur me këtë fakt ka reaguar ish-kryeministri Sali Bershia. Në një status në Facebook ai e ka quajtur atë që ka ndodhur në QSUT “bombë biologjike” dhe se tashmë ajo është shndërruar në “gjeneratorin kryesor të përhapjes së pandemisë së Covid 19”.
“Futja e Covid19 ne QSUT, infektimi masive i elitës mjekësore te vendit, e cila udhëheq diagnozën dhe mjekimin në shërbimet e specializuara të rasteve më të ndërlikuara nga mbarë vendi, do të thotë dekapitim i kësaj elite dhe kolaps i sistemit shëndetësor.
QSUT është aktualisht sipërmarrja me kolektivin numerik, personel shëndetësor, të sëmurë dhe punonjës ndihmës më të madh të vendit dhe me kontakte njerëzore më numerike dhe më intensive, më të shumta se çdo kolektivitet tjetër në Shqipëri. Shndërrimi i saj në bombë biologjike do të thotë krijimi i gjeneratorit më gjigand për përhapjen e Covid 19 në Shqipëri.
Rastet e të infektuarve këtyre ditëve me Covid19 kanë në bazë të padiskutueshme së paku për 80% të tyre bombën biologjike QSUT.”, shkruan Berisha.
Ai bën përgjegjës për këtë situatë kryeministrin Edi Rama dhe ministren e Shëndetësisë, Ogerta Manastirliu. Sipas ish-kryeministrit Berisha qeveria gaboi kur vendosi krijimin e spitalit COVID në urgjencën e QSUT si dhe ka lënë pa mjete mbrojtëse punonjësit dhe të sëmurët e këtij pavijoni.
“Situata kontagioze në QSUT u krijua nga kryepidemiologu xhahil i Surrelit dhe ndrikull Hajni Maska që me vendosjen e mjediseve për trajtimin e rasteve me Covid19 në urgjencën e këtij spitali gjë qe u dënua me forcën më të madhe tek qytetari dixhital nga mjekë dhe infermierë të asaj qendre në këtë FB!
Lënia pa mjetet mbrojtëse të punonjësve dhe të sëmurëve në pavijonet e këtij spitali ndaj Covid 19 për shkak të vjedhjeve shfrenuara me blerjen e maskave, kostumeve madje edhe të skaduara, mungesa e ujit, sapunit, dezinfektantëve në pavijone siç është denoncuar me zë dhe figure nga paciente te shtruar madje edhe me covid19 është mekanizmi i dyte madhor i megaskandalit te Sulltan Xhahil Surrelit dhe Ndrikull Hajni Maskes.”, deklaron Berisha. /Opinion.al
