Partia Demokratike dhe LSI kanë reaguar në lidhje me vendimin e QSUT-së për shkarkimin e mjekut të urgjencës Ilir Allkja.
Ish-deputeti i PD, Bardh Spahia tha se Shqipëria sot nuk ka mjekë mjaftueshëm për t’u shërbyer qytetarëve, por gjithsesi Edi Rama ka nisur shkarkimin politik të mjekëve që tregojnë të vërtetën për situatën në sistemin shëndetësor.
“Shqipëria sot nuk ka mjekë mjaftueshëm për t’u shërbyer qytetarëve, por Edi Rama ka nisur shkarkimin politik të mjekëve që nuk mbyllin gojën për të vërtetën e sistemit të rrënuar shëndetësor. Mjeku i urgjencës Ilir Allkja është shkarkuar nga detyra, pas më shumë se 20 vitesh pune e sakrifice dhe pasi u ka shërbyer mijëra e mijëra qytetarëve të sëmurë. Armiqësia e pushtetit ndaj një mjeku si Ilir Allkja duhet të jetë rast unik në botën demokratike. Shkarkimi i një mjeku të vijës së parë për agjitacion dhe propagandë në kulmin e pandemisë do të thotë se Edi Rama nuk pyet aspak për interesin publik. Është koha që profesionistët si Ilir Allkja të ngrenë zërin për të vërtetën dhe të drejtën! Vetëm kështu i shërbehet interesit publik! Ky pushtet i kalbur është në grahmat e fundit! Bashkë do ta ndryshojmë këtë situatë. Partia Demokratike ka vendosmërinë për t’i kthyer mjekëve dhe profesionistëve të shëndetësisë dinjitetin e nëpërkëmbur nga pushteti. Është koha për ndryshim!”, tha Bardh Spahia.
Ndërsa, kryetarja e LSI, Monika Kryemadhi përmes një postimi në rrjetet sociale shkruan se mjeku Allkja është një prej shumë qytetarëve të larguar nga puna në mënyrë të padrejtë nga Rilindja. Sipas Kryemadhit, qeveria e re do t’i riparojë këto padrejtësi duke krijuar hapësirat për rikthimin e tyre në punë.
“Solidarizohem me mjekun Ilir Allkja, i cili është një prej shumë qytetarëve të larguar nga puna në mënyrë të padrejtë nga Rilindja. Kjo situatë nuk ka nisur sot, por ne kemi dhe jemi duke mbajtur shënim çdo gjë. Qeveria e re do t’i riparojë këto padrejtësi duke krijuar hapësirat për rikthimin e tyre në punë, si dhe duke riparë të gjithë motivacionin e gjobave të presionit ndaj bizneseve dhe çdo subjekti të cilin Rilindja e trajton si armik. Ndryshimi po vjen!”, shkruan Kryemadhi.
Më herët, QSUT-së bëri me dije se mjeku Allkja ka shkelur kodin etik të punonjësit, prandaj dhe nuk duhet të vijojë të jetë më mjek pranë këtij shërbimi shtetëror./Opinion.al
