“Nëse Irani nuk firmos marrëveshjen, do ta bombardojmë pa mëshirë”: Optimizmin e radhës për firmosjen e një ujdie, presidenti amerikan Donald Trump e shoqëroi sërish me kërcënime, të cilat u mbështetën edhe nga një seri e re sulmesh gjatë natës të ushtrisë amerikane kundër objektivash ushtarakë të regjimit të ajatollahëve.
Komanda Qendrore e SHBA-së (CENTCOM) foli për “veprime vetëmbrojtëse”, të drejtuara kundër objektivave ushtarake, sistemeve të mbikëqyrjes dhe radarëve në jug të Iranit. Sumet erdhën pak orë pasi Trump it ha Foxneës se forcat amerikane do të godisnin Iranin “me forcë” ndërsa e akuzoi Teheranin se kishte vonuar tej mase arritjen e një marrëveshjeje për përfundimin e përhershëm të luftës. Sipas raportimeve të mediave amerikane, Trump la të kuptohet se bombardimet mund të ndalen nëse Teherani pranon një marrëveshje për t’i dhënë fund konfliktit. Në të kundërt, ai paralajmëroi se SHBA do të vazhdojë operacionet ushtarake deri në “shkatërrim të plotë”.
Në reagim ndaj sulmeve amerikane, ushtria iraniane pretendoi se kishte bllokuar plotësisht Ngushticën e Hormuzit dhe kishte nisur kundërsulme ndaj objektivave në Bahrein dhe Kuvajt. Në një deklaratë të transmetuar nga mediat shtetërore, autoritetet ushtarake iraniane paralajmëruan se çdo anije që do të përpiqej të kalonte nëpër këtë korridor strategjik detar do të konsiderohej objektiv ushtarak.
Sipas raportimeve iraniane, dy anije janë goditur gjatë incidenteve në zonë. Megjithatë, SHBA e kundërshtoi menjëherë këtë pretendim. Në një postim në platformën X, CENTCOM deklaroi se trafiku detar tregtar po vazhdonte normalisht dhe se anijet po hynin e po dilnin nga Ngushtica e Hormuzit pa pengesa.
