Ambasada Amerikane në Shqipëri vazhdon të mbështesë reformën në drejtësi, duke deklaruar se ajo po vijon në rrugën e duhur dhe sipas planit.
Këtë e ka thënë sot Dan Koski, zëvendës shef i Misionit në Detyrë në Konferencën e Planifikimit Urban dhe Zhvillimit Ekonomik.
“Reforma në Drejtësi vazhdon të ecë përpara, në rrugën e duhur dhe sipas planit. Qytetarët shqiptarë të ndihen të sigurt për këtë gjë, reforma nuk do të ndalojë. SHBA janë krenare për ndihmën që po u jepet këtyre institucioneve ndërsa ecin përpara. Shqipëria do të ketë shumë shpejt sistemin e ndershëm dhe transparent të drejtësisë që Kushtetuta parashikon. Ne do të vazhdojmë të ndihmojmë Shqipërinë për të goditur rrjetin e korrupsionit dhe për të çmontuar rrjetet e krimit të organizuar. Së bashku, ne kemi bërë progres që tashmë mund të nxjerrim në pah. Është përparim që do ta bëjë Shqipërinë një vend të sigurt për investitorët”, është shprehur ai.
Daniel Koski, deklaron se korrupsioni dhe krimi i organizuar dëmtojnë klimën e biznesit në Shqipëri dhe largojnë investitorët e huaj.
“Ka ende shumë punë për të bërë për të krijuar një klimë biznesi që mirëpret edhe më shumë investitorët. Korrupsioni dëmton çdo nivel të qeverisë, krimi i organizuar dëmton aktivitetet legjitime të biznesit, dhe gjyqësori i kompromentuar ndihmon favorizimin dhe manipulimet. Kjo i largon investitorët e huaj. Rruga për të ndërtuar ëndrrën shqiptare është ende e gjatë”, u shpreh Koski. Diplomati amerikan tha se SHBA do të japë mbështetjen që rrjetet e organizuara të krimit të zhbëhen, pasi qytetarët shqiptarë meritojnë një jetesë më të mirë. /Opinion.al
