Ish-deputeti Ervin Salianji deklaroi në një konferencë për mediat se kryebashkiaku që përflitet se shfaqet duke konsumuar kokainë në ambiente publike është Lefter Alla i Bulqizës.
“Opinioni publik është tronditur sot nga pamjet sesi kryebashkiaku ilegjitim i Bulqizës, i emëruar nga Edi Rama, është duke konsumuar kokainë. Kokaina, heroina, kanabisi, vjedhja, zhvatja janë cilësitë kryesore të kësaj bande që drejton sot vendin. Janë cilësitë e kryeministrit të Shqipërisë, që i ka klonuar tek emërimet e tij politike në pushtetin lokal dhe në administratën publike.”, deklaroi Salianji.
Pak më parë në disa foto të shkëputura nga një video, të publikuara nga ABC News, duket një person që konsumon kokainë në banakun e një lokali. Personi në fjalë u përfol se është një nga kryebashkiakët e vendit.
Lexo edhe: Çfarë dallohet në video: Kryebashkiaku kapet duke pirë kokainë
Gazetari Artan Hoxha kishte paralajmëruar ekzistencën e kësaj videoje diskredituese në emisionin Opinion .
“Është në ambient publik (lokal), se po të ishte në zyrë nuk ke si e filmon. Nëse e merr narkotikun në banesë apo në një ambient të mbyllur, nuk ka asnjë problem se thua jam përdorues. Përveç faktit që je i zgjedhur vendor, pastaj kalon në një nivel tjetër. Por, nëse e merr në ambient publik ky është problem”, deklaroi Artan Hoxha. /Opinion.al
