Kryeministri Edi Rama, ka organizuar një takim për prezantimin e buxhetit të vitit 2022, në Ministrinë e Mbrojtjes. Bashkë me ministrin Niko Peleshi, kanë bërë të ditur se rrogat do të rriten me 30% për të gjithë ushtarakët. Ai gjithashtu ka thënë se pagat për Forcat e Armatosura do të rriten edhe vitin e ardhshëm.
Edi Rama theksoi se Shqipëria sot nuk ka ushtrinë më pak të paguar në NATO.
“Dua ta filloj rreshtimin e pak pikave me shprehjen e lehtësimit tim që jam këtu me premtimin e mbajtur për një rritje të konsiderueshme të pagave. Pas zjarreve në gusht u thashë që do rrisim pagat dhe sot janë faktikisht janë të shkruara me 30 për % në pr.buxhetin e vitit të ardhshëm që së shpejti do miratohet nga Parlamenti. Sot ju them se vitin tjetër do t’i rrisim sërish pagat. Nuk ka asnjë arsye që FA-të, për potencialin që kanë të jenë mbrapa nga shumë vende të aleancës. Me këtë rritje pagash nuk kemi më ushtrinë më të pak paguar në NATO. Nuk jemi asnjë krye, se aty nuk besoj se do të arrijë ndonjëherë kush, nuk jemi as në mes, por nuk jemi më të fundit, ky është hapi i parë. Ambicia është që brenda mandatit të tretë ne të jemi diku në mes”, tha Rama.
Ai gjithashtu foli edhe për planin e ndërtimit të një akademie ushtarake, ku do të përgatiten edhe të rinj e të reja që do të bëhen pjesë e Forcave të Armatosura./Opinion.al
